Koronavırýs qaýpi: Balalardy qorǵaý men sheteldik saparlardy qysqartýǵa mán berý kerek
«Syrqattanýdyń ósýi barlyq óńirlerde baıqalyp otyr. Ótken aptamen salystyrǵanda aýrý 2,6 esege ósti. Búgingi kúni 14 óńirdiń – Soltústik Qazaqstan oblysynyń, Batys Qazaqstan oblysynyń, Aqmola, Mańǵystaý, Almaty, Atyraý, Pavlodar, Qostanaı, Batys Qazaqstan, Shyǵys Qazaqstan, Qaraǵandy oblystarynyń ákimderi, Nur-Sultan, Almaty, Shymkent qalalarynyń ákimderi kúsheıtilgen sharalar qabyldady. Kúsheıtilgen sharalar qoǵamdyq tamaqtaný obektileriniń toltyrylýyn azaıtýǵa, kásipkerlik nemese ózge de qyzmet obektileriniń jáne halyqtyń tynys-tirshiligine qyzmet etetin nysandardyń jumys kestesin qysqartýǵa, shekteý sharalaryn saqtaýǵa, demalys kúnderi qoǵamdyq kólik qozǵalysyn toqtata turýǵa baǵyttalǵan», - dedi QR Densaýlyq saqtaý vıtse-mınıstri Ajar Ǵınııat Ortalyq kommýnıkatsııalar qyzmetinde.
Osy oraıda vedomstvo ókili koronavırýs ınfektsııasynyń taralýy kezeńinde balalardyń densaýlyǵyn saqtaý baǵytyna erekshe toqtaldy.
Vıtse-mınıstrdiń aıtýynsha, kún saıyn jańa týǵan náresteler men koronavırýstyq ınfektsııasy bar balalar jaǵdaıyna monıtorıng pen baqylaý júrgiziledi. Bıyl elimizde COVID-19 dıagnozy rastalǵan barlyǵy 3 164 bala tirkelgen, onyń ishinde 114 jańa týǵan náreste bar. Bul turǵyda barlyq jaǵdaılar PTR nátıjelerimen rastalǵan.
Belgili bolǵandaı, COVID-19 dıagnozy zerthanalyq rastalmaǵan KVI 1810 balada tirkelgen. Balalarda COVID-19 ınfektsııasynan ólim-jitim bolǵan joq.
«Koronavırýstyq ınfektsııanyń aǵymy 85 paıyz (2697) balalarda sımptomsyz jáne jeńil boldy, 14,2 paıyzynda (448) ortasha dárejede jáne 19 balada aýyr boldy. Bul barlyq jaǵdaılardyń 0,6 paıyzyn qurady, barlyǵy statsıonarlyq jaǵdaıda emdeldi», - dedi A. Ǵınııat.
Qazirgi kezde COVID-19 indeti bar 340 bala baqylaýda tur, onyń ishinde jańa týǵan 3 náreste, 18 jasqa deıingi balalar-337, emdeýge jatqyzylǵandar - 55, ambýlatorııalyq emdeýde – 285.
Aıta keteıik, COVID-19 indeti bar 200 oqýshy, sondaı-aq balabaqshanyń kezekshi tobyna barǵan 18 bala jáne ınternattan 21 bala baqylaý sharalarymen qamtyldy.
«2020 jylǵy tamyzdan bastap respýblıkada COVID–19 indetimen astasqan mýltıjúıelik qabyný sındromy (Kavasakıge uqsas sındrom) jaǵdaılary tirkele bastady. Aýrý ýshyqqan jaz aılarynan keıin balalar arasynda atalǵan indet anyqtaldy. Úsh aptadan beri balalar arasynda bul aýrý tirkelmedi», - dedi vıtse-mınıstr.
Bıyl mýltıjúıelik qabyný sındromy bar 42 bala tirkelgen, qazirgi ýaqytta mundaı dıagnozy bar patsıentter joq.
Aıtpaqshy, Ajar Ǵınııat koronavırýsty qaıta juqtyrý deregi Qaraǵandy oblysynda tirkelgenin aıtty. Al Batys Qazaqstan oblysyndaǵy jaǵdaı rastalmady, ıaǵnı osy óńirdegi áıel adamnyń indetke shaldyǵýy qaıta juqtyrý deregi retinde qarastyrylmaı otyr.
KVI boıynsha testileý artty
Búginge deıin Qazaqstanda koronavırýs ınfektsııasyna qatysty 3 mln 655 testileý júrgizildi. Esterińizde bolsa, shilde aıynda Qazaqstanda testileý deńgeıi táýligine 40 myńnan sál astam bolatyn. Qazirgi kezde bul kórsetkish táýligine 70 myńǵa jetkizildi. Júrgizilgen testileý kólemi epıdemıologııalyq jaǵdaıdy eskere otyryp artyp keledi.
QR Densaýlyq saqtaý mınıstrligi Sanıtarlyq-epıdemıologııalyq baqylaý komıtetiniń tóraıymy Aıjan Esmaǵambetovanyń sózine qaraǵanda, ótken aptada el boıynsha testileý sanynyń 10 paıyzǵa óskeni baıqaldy. Al keıbir óńirlerde bul kórsetkish eselep artty.
«Soltústik Qazaqstan oblysynda testileý úsh esege, Shyǵys Qazaqstan oblysynda eki esege, Almaty oblysynda 2,4 esege, Aqmola oblysynda 1,6 esege ósti. Sonymen qatar, qalǵan óńirlerde de testileý deńgeıi artyp keledi», - dedi komıtet basshysy.
A. Esmaǵambetova koronavırýs ınfektsııasy qaıtadan juqtyryp alý qaterin eskere otyryp, el halqyn saqtyq sharalaryn oryndaýǵa shaqyrdy.
«Osy oraıda álem elderinde indetti qaıta juqtyrý oqıǵalary tirkelip jatqanyn túsiný kerek. Bul óz kezeginde aýrýdy eńsergennen keıingi ımmýnıtet uzaq emes, qysqa merzimdi ekeni taǵy da rastalyp otyr. Halyqaralyq zertteýlerge sáıkes, aýrýdan emdelgennen keıingi ımmýnıtet 1-den 3 aıǵa deıin saqtalady. Іndetti qaıta juqtyrý múmkindigi bar ekenin bilemiz. Aýrýdan emdelgen adamdar barlyq aldyn alý sharalaryn saqtaý kerektigin este saqtaǵany durys», - dedi ol.
Sonymen qatar komıtet basshysy Qazaqstan azamattaryna shetelge barmaýǵa keńes berdi. Sebebi ózge memleketten saparlap kelgender arasynda indet juqtyrý jaǵdaılary artyp keledi.
«Sondyqtan shetelge saparlaýdy josparlasańyzdar, ol elde koronavırýs ınfektsııasyn juqtyrý qaýpi bar ekenin eskerińizder. Qazirgi kezde múmkindiginshe shetelge shyqpaýǵa tyrysý kerek», - dedi A. Esmaǵambetova.