Koronavırýs qateri: BQO-da bir kúnde klınıkalyq belgileri joq 91 tasymaldaýshy tirkeldi
ORAL. QazAqparat – Batys Qazaqstan oblysynda 29 maýsymda klınıkalyq belgileri joq 91 adam tirkeldi, dep habarlaıdy QazAqparat tilshisi.
BQO taýarlar men kórsetiletin qyzmetterdiń sapasy men qaýipsizdigin baqylaý departamentiniń baspasóz qyzmeti málim etkenindeı, 3 maýsymnan beri koronavırýs dertiniń klınıkalyq belgileri joq tasymaldaýshylar sany 1162-ge jetti.
Sondaı-aq keshe koronavırýs juqpasynyń aýrý belgilerimen 31 adam (ósim – 2,2 paıyz) anyqtaldy. Sonyń 10-y buryn aýyrǵandarmen qarym-qatynasta bolsa, 6 adamnan epıdemıologııalyq qadaǵalaý boıynsha synama alynǵan. 15-i ózdiginen medıtsınalyq kómekke júgingen.
Sonyń ishinde 24-i Oral qalasynda tirkelse, úsheýi – Bókeı ordasy, tórteýi Terekti aýdanynyń úlesine tıedi.
Óńirde barlyq aýyrǵandar sany 1462 bolsa, sonyń 1103-i Oralda, Bókeı ordasy aýdanynda – 19, Bórlide – 41, Jańaqalada – 8, Jánibekte – 27, Báıterekte – 84, Qaratóbede – 6, Syrymda – 31, Tasqalada – 48, Terektide – 45, Qaztalovta – 3, Shyńǵyrlaýda 6 adam indet juqtyrǵan.
Kúni búginge deıin 893 adam jazylyp shyqsa, 10-y kóz jumdy.
Qazirgi tańda 30 adam karantındik, 131 adam provızorlyq statsıonarda jatsa, úılerinde oqshaýlanǵan 587 adam dárigerler baqylaýynda.
Oblystyq densaýlyq saqtaý basqarmasynyń naqtylaýynsha, 504 adam juqpaly aýrýlar statsıonarynda emdelýde. Sonyń ishinde 62 adamnyń jaǵdaıy aýyr. 10 adam jasandy tynys alý apparatyna qosylǵan.
Eske sala keteıik, budan buryn BQO-da 150-den astam medıtsına qyzmetkeriniń koronavırýs juqtyrǵanyn jazǵan bolatynbyz.
