Koronavırýs: Qaraǵandyda otbasymen aýrýhanaǵa túskender kóbeıip barady
QARAǴANDY. QazAqparat – Qaraǵandy oblysynyń aýrýhanalarynda 2 290 adam koronavırýs ınfektsııasynan em alýda. Jansaqtaý bóliminde 89 adam jatyr, dep habarlaıdy QazAqparat tilshisi.
Aýrýhanaǵa jatqyzylǵandardyń 99%-y vaktsına almaǵan. Kóbinese aýrýhanalarǵa búkil otbasylarymen túsedi.
«Otbasymyzben birge vaktsınatsııalaýǵa úlgermedik. Aýrýhanaǵa anamyzben birge tústik. Onyń qant dıabeti bar. Aýrý óte qaýipti jáne sizdi ne kútip turǵanyn bilmeısiz. Medıtsına qyzmetkerlerine kásibıligi úshin rahmet. Emdelip, qalpymyzǵa kelgen soń mindetti túrde egiletin bolamyz», – dedi qaraǵandylyq naýqastardyń biri.
Kovıdtik aýrýhanalarda dárigerler táýlik boıy jumys isteıdi. Únemi aralaý, emdeý, satýratsııany tekserý qajet. Naýqastarǵa tynys alý jattyǵýlaryn jasaýǵa, kóp suıyqtyq ishýge jáne etbetimen jatýǵa keńes beriledi.
«Qyzyl» aımaqtaǵy dárigerler qaraǵandylyqtardan bir ǵana nárse – ekpe jasaýdy suraıdy. Vaktsınatsııalanǵan adam koronavırýs ınfektsııasyn juqtyrsa da, aýrý áldeqaıda jeńil bolady.
Qaraǵandy oblysynda 19 shildedegi jaǵdaı boıynsha vaktsınanyń birinshi komponentin 351 018 adam, ekinshisin 197 253 adam aldy.
