Koronavırýs: Qaraǵandyda «Birinshi tolqyn» kórkem fılminiń tusaýy kesildi

QARAǴANDY. QazAqparat – Qaraǵandyda COVID-19 pandemııasynyń bastalýy týraly «Birinshi tolqyn» atty tolyq metrajdy kórkem fılmniń resmı tusaýkeseri ótti. Drama naqty oqıǵalarǵa negizdelgen jáne koronavırýstan qaıtys bolǵandarǵa arnalǵan, dep habarlaıdy QazAqparat tilshisi.

Lentany Qaraǵandy oblysy ákimdiginiń qoldaýymen Saryarqa telearnasy jáne Armanfilms kınostýdııasy túsirdi. Fılmniń prodıýser ári stsenarısi telearna basshysynyń orynbasary Jánibek Sadyqanov boldy. Stsenarıı boıynsha onymen birge Dmıtrıı Belýgın jumys istedi. Fılmniń qoıýshy-rejısseri Arman Álimjanov.

Kartına boıynsha jumys segiz aı boıy jalǵasyp, Qaraǵandy men oblystyń ártúrli jerlerinde júrgizildi. Bul medıtsınalyq mekemeler, polıtsııa bólimshesi jáne qarapaıym Maıqudyq shaǵynaýdanynyń aýlalary. Túsirilimge tek Qaraǵandy oblysynyń turǵyndary – kásibı jáne kásibı emes akterler qatysty. Kastıngke 300-den astam adam ótinim bildirdi.

«Men bul jobaǵa qatysqanyma óte qýanyshtymyn. Sulýlyq salasynda jumys isteımin, biraq bala kezimnen aktrısa bolýdy armandadym. Bir jarym jyl buryn Qaraǵandyda akterlik sheberlik kýrsyn bitirdim. Túsirilimge óte jaýapkershilikpen qaradym, rólge tolyqtaı shomyp kettim desem bolady», – deıdi fılmde volonterler jetekshisiniń rólin oınaǵan Nargız Arkenova.

Kartınada koronavırýstyń alǵashqy tolqyny kezinde kóptegen qaraǵandylyqtardyń tap bolǵan synaqtary týraly baıandalady. Kórkem fılm derekti hronıkamen úılestirilgen.

«Pandemııa meniń otbasyma da áser etti. Ájem men tátem qaıtys boldy. Jaqyndary men týystarynan aırylǵan kóptegen adamdardy bilemin. Keıipkerler jaı ǵana paıda bolǵan joq. Stsenarııdi jaza otyryp, men barlyǵyna janym ashyp, qıyndyqtardy olarmen birge ótkergendeı boldym. Ózimniń osy jumysymdy jaqyndaryn joǵaltqandarǵa jáne qaıǵy keshkenderge arnaımyn», – deıdi stsenarıst Dmıtrıı Belýgın.

Rejısser Arman Álimjanovtyń aıtýynsha, bul – bizben birge turatyn qarapaıym adamdar týraly fılm. Pandemııaǵa qatysty barlyq jaǵdaı bul jalǵanda adam ómiri men árbir adam qandaı ekenin kórsetti. «Biz kúndelikti ómirdegi adamdardyń problemalary týraly aıtyp otyrmyz. Bul rette olardyń eń ózekti máselelerin qozǵaımyz. Bas keıipker Qaraǵandynyń úlken aýdandarynyń biri Maıqudyqta ákesiz ósedi. Men ózim osy aýdannan shyqqanmyn jáne ne jaıly aıtyp otyrǵanymdy túsinemin. Biz qylmystyq beıimdiligi bar kóshedegi jigittiń qalaı ózgerip, durys joldy tańdaıtynyn kórsetkimiz keldi», – deıdi ol.

Fılm eń qyzyqty jerde aıaqtalady. 2022 jyly serıal túrinde shyǵady. 8 serııa shyǵarý josparlanýda. Ázirge kartınanyń úlken ekrandarda kórsetilýi úshin ony tirkeýge arnalǵan qujattar QR Mádenıet jáne sport mınıstrligine joldandy.