Koronavırýs: Qaraǵandy oblysynda qoǵamdyq qorǵa jınalǵan aqsha qaıda jumsaldy
QARAǴANDY. QazAqparat – Qaraǵandy oblysynda koronavırýstyń taralýymen kúresý úshin qurylǵan «Kómek-2020» oblystyq qoǵamdyq qoryna 282 728 322 teńge tústi. Bul, kásiporyndar men qarapaıym halyqtyń aýdarǵan aqshasy. Bul týraly Qaraǵandy oblysy ákiminiń baspasóz qyzmetinen málim etti, dep habarlaıdy QazAqparat tilshisi.
Jınalǵan qarajattyń 58 mln 750 myń teńgesine «SAP-01» markaly 10 dezınfektor-búrikkish kólik satyp alynǵan, (búgingi kúni somasy tolyq tólenbedi), 33 918 926 teńgege aspaly jáne benzın búrikkishteri alyndy. Oblys aýrýhanalaryna dári-dármek jáne medıtsınalyq qural-jabdyqtar satyp alýǵa 92 339 889 teńge baǵyttaldy. COVID-19 indetimen kúresýge qatysqan medıtsınalyq qyzmetkerlerdiń mekemelerde turýyna jáne tamaqtanýyna 34 938 500 teńge jumsaldy. Medıtsına qyzmetkerlerin karantın jaǵdaıynda turyp jatqan turǵylyqty jerlerinen jumysqa deıin tasymaldaý úshin 1 992 000 teńge baǵyttaldy. COVID-19 juqtyrý qaýpi bolǵan «Oblystyq jedel medıtsınalyq járdem stantsııasy» KMK qyzmetkerleriniń syıaqysyna 68 949 750 teńge bólindi.
Esterińizge sala keteıik, Qaraǵandyda koronavırýstyń taralýymen kúresý úshin «Kómek-2020» oblystyq qoǵamdyq qory qurylǵan bolatyn. Aqshanyń jumsalýyn Qamqorshylyq keńes baqylaıdy. Oǵan esimi belgili qaraǵandylyqtar endi: medıtsına ǵylymdarynyń doktory, professor, QR Memlekettik syılyǵynyń ıegeri Qanı Musulmanbekov; «Rýhanı jańǵyrý» baǵdarlamasyn júzege asyrý boıynsha Qaraǵandy oblysy ákiminiń keńesshisi, Qazaqstan halqy Assambleıasynyń múshesi, oblystyq máslıhat depýtaty Bekzat Altynbekov; «Qaraǵandy medıtsına ýnıversıteti» KEAQ rektorynyń keńesshisi, Qazaqstan halqy Assambleıasynyń ǵylymı-saraptamalyq tobynyń múshesi Vılen Molotov-Lýchanskıı; QR eńbek sińirgen óner qaıratkeri, QR Jazýshylar Odaǵynyń múshesi Serik Aqsuńqaruly; QR eńbek sińirgen jattyqtyrýshysy, sporttyń Qurmetti qaıratkeri Valerıı Gromov.
«Kómek-2020» qoǵamdyq qoryna kez kelgen adam óz úlesin qosa alady.
