Koronavırýs: Qaraǵandy oblysynda 50 mektep karantınge jabylǵan

NUR-SULTAN. QazAqparat - Bıylǵy oqý jylynyń tórtinshi toqsannyń basynan Qaraǵandy oblysynda oqýshylar arasynda koronavırýs ınfektsııasyn juqtyrýdyń 516 jaǵdaıy tirkeldi.

Sonymen qatar, mektep qyzmetkerleri arasynda KVI-diń 47 jaǵdaıy tirkeldi. Oblys kóleminde 50 mektep karantınge jabyldy, dep habarlaıdy QazAqparat QR Úkimeti janyndaǵy Qazaqstanda koronavırýstyń taralýyna jol bermeý jónindegi vedomstvoaralyq komıssııanyń Telegram kanalyna silteme jasap.

Oqýshylar arasynda tirkelgen jaǵdaıdyń 394-i offlaın rejımde oqyǵan balalar arasynda, 122-si qashyqtan oqyǵan balalr arasynda bolǵan.

«Offlaın» rejıminde oqyp indetti juqtyrǵan oqýshylardyń 67,3% 1-5 synyp oqýshylary arasynda tirkelgen. Joǵaryda aıtylǵandarǵa baılanysty, oqýshylar arasynda koronavırýs ınfektsııasynyń taralýyn azaıtý maqsatynda Qaraǵandy, Balqash, Jezqazǵan, Temirtaý, Saran, Shahtınsk jáne Abaı qalalarynda 1-5 synyp oqýshylaryn qashyqtan oqytýǵa aýystyrý týraly sheshim qabyldandy»,-delingen habarlamada.