Koronavırýs: Qaraǵandy oblysyna 250 myń medıtsınalyq maska jetkizildi
QARAǴANDY. QazAqparat – Qaraǵandy oblysynyń Densaýlyq saqtaý basqarmasynyń basshysy Erjan Nurlybaev aımaqtaǵy COVID-19 koronavırýs jaǵdaıy týraly aıtyp berdi.
Bul aqparat eldegi tótenshe jaǵdaı rejımi ótetin ýaqyt aralyǵynda kún saıyn jańartylyp otyrady, dep habarlaıdy QazAqparat tilshisi.
Qazirgi tańda 47 qaraǵandylyq karantınde jatyr, olar táýlik boıyna dárigerlerdiń baqylaýynda. Olardyń barlyǵy 1A - Italııa, Iran, Ońtústik Koreıa, QHR memleketterinen kelgen.
Úı karantıninde – 52 adam, medıtsınalyq baqylaýda - 155 adam jatyr. Taǵy 260 adam dárigerlerdiń qashyqtan monıtorıngileý sharasymen qamtylǵan. Olarda koronavırýs belgileri joq.
«Búgingi tańda 250 myń betperde ákelinip, olar «Bıosfera» dárihanasyna jetkizilýde. Apta sońyna deıin óńirge taǵy 200 myń betperde jetkiziledi», - dedi Erjan Nurlybaev.
Esterińizge sala keteıik, óńirde dezınfektsııalyq eritindiler óndirisi bar.
«Dezınfektsııalyq quraldardyń alypsatarlarynyń jolyn kesý úshin olar densaýlyq saqtaý basqarmasynyń ruqsat qaǵazy boıynsha beriledi. Bizdiń is-áreketterimizdiń ashyqtyǵyn qamtamasyz etý úshin biz áleýmettik jelilerde dezınfektsııalyq quraldardy alatyn kúnder, tıeý kólemi jáne ol quraldardy alýshylar týraly aqparatty ornalastyratyn bolamyz», - dep atap ótti Densaýlyq saqtaý basqarmasynyń basshysy.
Ol sondaı-aq oblysta maskalar men antıseptıkterdi satyp alýǵa qarajat bólinetinin aıtty. Olar Densaýlyq saqtaý, polıtsııa, HQKO jáne basqa da bólimshelerdiń qyzmetkerlerin qamtamasyz etedi. Bular adamdarmen turaqty ári tyǵyz baılanystajumys isteıtin organ ókilderi.
Qaraǵandy oblysynyń statsıonarlarynda karantın jarııalandy. Kelýshilerdi naýqasqa kirgizbeıdi, biraq qajetti zattar men azyq-túlikterdi belgilengen ýaqytta berýge bolady.
Densaýlyq saqtaý basqarmasynyń mamandary TJ rejımi kezinde adamdar kóp jınalatyn jerlerge barýdan bas tartýdy suraıdy. Qazaqstandyqtarǵa úıde qalýǵa, otbasylyq saltanattardan jáne estelik is-sharalar ótkizýden bas tartýǵa keńes beredi. Koronavırýsty aldyn alý úshin qoldy jáne betti sabynmen jıi jýý qajet.
JRVI belgileri anyqtalǵan jaǵdaıda dárigerdi úıge shaqyrý kerek.
Aımaqta COVID-19 vırýsy týraly aqparatqa alý úshin densaýlyq saqtaý basqarmasynyń (8-7212) 955-559 shuǵyl jeli telefony boıynsha habarlasýǵa bolady.
