Koronavırýs: Izraılde alǵash ret indetten eshkim kóz jumǵan joq, Úndistanda jaǵdaı qıyndady

NUR-SULTAN. QazAqparat - Qazaqstanda koronavırýstyń taralýyna qarsy vedomstvoaralyq komıssııa álemdegi epıdemıologııalyq ahýalǵa sholý jasady, dep habarlaıdy QazAqparat.

Izraılde 10 aıda alǵash ret táýlik ishinde COVID-19-dan bir de bir ólim jaǵdaıy tirkelgen joq.

Buǵan deıin 10 kún ishinde kúndelikti ólim-jitim sany bes adamnan aspady, al 22 sáýirde ol bireýge deıin azaıdy.

Qazirgi ýaqytta Izraıl álemdegi vaktsınatsııanyń eń joǵary deńgeıine ıe.

Beısenbide elde vaktsınanyń eki dozasyn qabyldaǵandardyń sany 5 mıllıonnan asty. ⠀

Úndistan kúnine alǵash ret koronavırýspen aýyratyndar sany boıynsha álemde birinshi orynǵa shyqty.

Ólim deńgeıi men juqtyrǵandardyń jalpy sany boıynsha ol AQSh-tan keıingi ekinshi orynda.

Bul rette elde halyqtyń 10% jýyǵy vaktsınatsııalandy.

Germanııada 300-den astam qala men okrýgte karantın kúsheıtilip, komendanttyq saǵat keshki 10-nan bastap kúshine enedi.

Qatań shekteýler kem degende maýsym aıynyń sońyna deıin qoldanylady.

Berlınde jaǵdaıdy vaktsınatsııa arqyly baqylaýǵa alýǵa bolady dep kútilýde.

Italııada kafeler men meıramhanalar ashylýǵa daıyndalyp jatyr: dúısenbide olar alǵashqy kelýshilerdi qabyldaı alady, biraq ázirge tek terrassada ǵana ruqsat etilgen.

Grekııada senbi kúninen bastap satyp alýshylar azyq-túlik satpaıtyn dúkenderge de kire alady.

Buǵan deıin olar tek tapsyryspen jumys istegen. Endi saýdany burynǵydaı jasaýǵa múmkindik berildi.

Sonymen qatar, shashtarazdar men sulýlyq salondary jumysy qaıta jandandy.