Koronavırýs: Italııada vırýs juqtyrǵandar sany 10 myń adamnan asty
RIM. QazAqparat – Italııanyń Azamattyq qorǵaý ulttyq qyzmetiniń basshysy Andjelo Borrellı elde koronavırýs juqtyrǵandardyń jalpy sany 10 myń adamnan asty dep málimdedi. Bul týraly QazAqparat ANSA agenttigine siltteme jasap habarlaıdy.
Borrellı koronavırýstan kóz jumǵandar sany 631 adamǵa jetken. Bul dúısenbi kúngimen salystyrǵanda 168 adamǵa kóp.
«8 514 adam qazirgi ýaqytta COVID-19 vırýsyn juqtyrǵan, 1004 adam saýyǵyp shyqqan», dedi ol.
Borrellıdiń aıtýynsha, koronavırýs juqtyrǵan 877 patsıent jansaqtaý bóliminde jatyr. Qaıtys bolǵandardyń 45%-y – 80-89 jas aralyǵyndaǵy adamdar, 32%-y – 70 jas shamasyndaǵy, 14%-y – 90 jastan asqan, 8%-y – 60 jastaǵy, 2%-y – 50-59 jas aralyǵyndaǵy adamdar. Úkimet ótken jyldyń sońynda Qytaıdyń Ýhan qalasynda alǵash ret tabylǵan jańa vırýstyń taralýyn toqtatý úshin qatań sharalar qabyldady.
Italııa turǵyndaryna qajetsiz saparlardan bas tartýǵa jáne shuǵyl qajettilik bolmasa, múmkindiginshe úılerinen shyqpaýǵa keńes beriledi.
Sondaı-aq, Borrelı oppozıtsııalyq lıganyń kóshbasshysy Matteo Salvınıdiń «barlyǵyn jabý» týraly úndeýinen keıin sharalardy qataıtý múmkindigin joqqa shyǵarmady.
«Meniń oıymsha, bul másele tolyǵymen qarastyrylyp, zerttelýi kerek», - dedi Borrellı baspasóz máslıhatynda.
Eske sala keteıik, Italııada koronavırýstan kóz jumǵan alǵashqy jaǵdaı 21 aqpanda tirkelgen bolatyn.
