Koronavırýs: Ispanııa serýendeýge jáne júgirýge ruqsat bermek
NUR-SULTAN. QazAqparat - Ispanııa Premer-Mınıstri Pedro Sanches senbi kúni keshkisin ótken baspasóz máslıhaty barysynda koronavırýs juqtyrý jaǵdaıynyń kórsetkishi tómendeıtin bolsa, ıspandyqtarǵa 2 mamyrdan bastap serýendeýge, jattyǵý jasaýǵa nemese júgirýge shyǵýǵa ruqsat beriletindigin málimdedi.
Bul jaıynda atalǵan eldiń EL PAÍS basylymy jazdy, dep habarlaıdy QazAqparat tilshisi.
Bul Ispanııa Úkimetiniń elde 14 naýryzdan beri engizilgen qatań sharalardy jeńildetýge baǵyttalǵan ekinshi qadamy bolyp otyr. Jeksenbi kúnderi 13 jasqa deıingi balalarǵa eresek adamdardyń qaraýymen bir saǵat dalada serýendeýge ruqsat berilmek.
«Eger biz abaılap áreket etetin bolsaq, onda bul sharadan keıin bir aptadan soń taǵy bireýi qoldanysqa engiziledi», - dedi Pedro Sanches.
El Premer-Mınıstriniń túsindirýinshe, árbir óńirdegi ahýalǵa baılanysty túrli jyldamdyqpen karantın jeńildetile bastaıdy. Sonymen qatar ol ortalyqtyń úkimet karantın sharalaryn bosańdatý josparyna jaýapty bolatyndyǵyn eskertti. Ispanııa Mınıstrler kabıneti seısenbi kúnine tıisinshe jospardy bekitýi qajet.
Atap óterligi, sońǵy 2 kún boıy Ispanııadaǵy koronavırýs indetinen kún saıynǵy ólim-jitim 400-den tómen bolyp otyr. Degenmen, indet Ispanııaǵa aýyr soqqy boldy. Resmı derekke sáıkes, 22 902 adam indetten kóz jumdy. Al indet juqtyrǵan patsıentterdiń sany 223 759 adamǵa jetken. Biraq, qarttar úıindegi koronavırýs saldarynan ólgenderdiń resmı tirkelmegendigin eskerer bolsaq, bul san áldeqaıda joǵary ekendigi túsinikti.
Sońǵy málimetterge qaraǵanda, Covid-19 juqtyrýdyń 20 paıyz jaǵdaıy densaýlyq saqtaý qyzmetkerlerinen anyqtalǵan. Bul kórsetish ózge elderdegi derekterge qaraǵanda birshama joǵary. Osyǵan qaraı sarapshylar mundaı jaıttyń bolýyna josparlaýdyń nasharlyǵy men testileýge arnalǵan jıyntyqtar men qorǵanys quraldarynyń jestipeýshiligi sebep dep otyr.
