Koronavırýs: Ispanııa qaıtadan karantın engizip, Ońtústik Koreıada indet juqtyrǵandar artty

Juma kúni DDSU sońǵy táýlikte 284 myń adamnyń Covid-19 juqtyrǵanyn habarlady. Sol kúni 30 sáýirden bergi eń kóp ólim jaǵdaıy tirkeldi. Bir táýlikte 9753 adam kóz jumǵan.

Ispanııa qaıtadan shekteý sharalaryn engizip jatyr

Ispanııa lokdaýndy alyp tastaǵannan keıin bir aıdan soń qaıtadan shekteý sharalaryn engizip jatyr. Sebebi elde koronavırýs ınfektsııasyn juqtyrǵandar kóbeıgen. El bıligi epıdemııanyń ekinshi tolqyny bastala ma dep qaýiptenip otyr.

Barselonada da vırýs juqtyrǵandar sany artyp jatyr.

Juma kúni Ispanııa densaýlyq saqtaý mınıstri Salvador Ilıa sońǵy táýlikte 900-den astam koronavırýs juqtyrý oqıǵasy tirkelgenin habarlady.

Katalonııa bıligi vırýs juqtyrǵandar sanynyń artýyna baılanysty óńirdegi túngi klýbtardyń jumysyn toqtatty.

Syrqattanǵandardyń kópshiligi – ferma jumysshylary men túngi klýbtarǵa barǵandar. Sonymen qatar, kóbi otbasylyq mereke men dostar jáne týystarymen kezdesý kezinde juqtyrady.

Madrıdte de jaqyn kúnderi shekteý sharalary engizilýi múmkin. Ispanııa astanasynyń bıligi turǵyndardy jabyq ǵımarattyń ishinde, tipti úıge qonaqtar, kórshi nemese kýrer kelse de maska taǵyp júrýdi surady.

Madrıd turǵyndaryna jaqyn kúnderi bar men meıramhanalarǵa kelýshilerdiń sany boıynsha shekteý engizetinin eskertti.

Ispanııanyń kishigirim Totana qalasy (Sýrsııa provıntsııasy) 55 adam ınfektsııaǵa shaldyqqannan keıin karantınge jabyldy. Boljam boıynsha, syrqattanǵandardyń barlyǵy bir barǵa barǵan.

Ispanııada Covid-19 juqtyrǵandar sanynyń artqanyna Parıj alańdap otyr. Frantsııa bıligi azamattaryna múmkindiginshe Katalonııaǵa barmaýdy surady. Al, Norvegııa Ispanııadan kelgenderdi karantınge jatqyzatynyn málimdedi.

Frantsııa: ushyp kelgenderden test alynady

Frantsııa premer-mınıstri Jan Kasteks Frantsııaǵa tómendegi 16 elden ushyp kelgenderdiń mindetti túrde koronavırýstyń bar-joǵyn anyqtaıtyn test tapsyratynyn málimdedi: AQSh, Brazılııa, Aljır, Bahreın, Izraıl, Úndistan, OAR, Kýveıt, Katar, BAÁ, Oman, Panama, Perý, Serbııa, Túrkııa jáne Madagaskar.

Bul elderden Frantsııaǵa týrısterdiń kelýine tyıym salynǵan. Premer-mınıstrdiń aıtýynsha, osy tizimdegi elderden kelgen frantsýzdar men Frantsııada turatyn osy eldiń azamattary taldaý tapsyratynyn túsindirdi. Vırýs anyqtalǵan azamattar eki apta karantınde jatady.

Ońtústik Koreıa: reseılik teńizshiler syrqattanǵan

Ótken táýlikte Ońtústik Koreıada 113 vırýs juqtyrý oqıǵasy tirkeldi. Bul sońǵy úsh aıdaǵy eń joǵary kórsetkish. Juqtyrý oqıǵalarynyń kóbi - «syrttan ákelingen», naýqastanǵan 113 adamnyń tek 27-i ǵana sońǵy aptada eshqaıda shyqpaǵan.

Ońtústik Koreıadaǵy Pýsan qalasynyń portynda turǵan «Petr Pervyı» balyq aýlaıtyn kemesindegi 23 reseılik teńizshiden Covid-19 anyqtaldy.

Ońtústik Koreıadaǵy Reseı bas konsýldyǵy syrqattanǵan Reseı azamattarynyń aýrýhanaǵa jatqyzylatynyn málimdedi.

Osy aptada Irakta jumys istep júrgen 293 ońtústikkoreıalyq azamat elge oraldy. Kóbinde Covid-19 anyqtalǵan.

Tramp retseptik preparattardy arzandatqysy keledi

AQSh prezıdenti Donald Tram AQSh-taǵy retseptik preparattardyń baǵasyn tómendetýge shaqyratyn tórt jarlyqqa qol qoıdy. Tramp qol qoıǵan qujat mundaı dári-dármekke jeńildik jasaýǵa múmkindik beredi.

Seısenbi kúni Tramp amerıkalyq farmatsevtik kompanııa basshylarymen kezdesedi, biraq prezıdent sheshimin keı farmatsevter men sarapshylar synap jatyr. Olardyń pikirinshe, Tramp qarastyrǵan sharalar tıimdi emes jáne dári-dármek baǵasynyń tómendeýine áser etpeıdi.

AQSh turǵyndary álemniń basqa damyǵan elderimen salystyrǵanda dári-dármekke eki ese kóp qarajat jumsaıdy. EYDU deregi boıynsha, 2015 jyly brıtandyqtar ortasha eseppen 497 dollarǵa dári satyp alsa, amerıkalyqtar 1162 dollar jumsaǵan.

Anglııada basseın men fıtnes-klýbtar ashylady

Anglııada senbiden bastap jabyq basseınder, fıtnes-klýbtar men sport obektileri ashylady. Boljam boıynsha, sportzaldardyń úshten biri shyǵynǵa ushyraǵandyqtan jumysyn jandandyra almaı otyr.

Ashylǵan sport obektileri sanıtarııa erejelerin qatań saqtaýǵa mindetteledi.

Anglııada ashyq aspan astyndaǵy sport obektileri 4 shildeden bastap jumys istep jatyr.

Jattyǵý zaldary Soltústik Irlandııada ashylǵan, al Ýels pen Shotlandııada olar burynǵysha jabyq tur.

Brıtanııa bıligi el turǵyndaryna artyq salmaq Covid-19-dyń kúrdeli ótýine sebep bolatynyn taǵy da eskertti.

Eldiń densaýlyq saqtaý mınıstrliginiń málimetinshe, semizdikpen aýyratyn naýqastardyń Covid-19-dan qaıtys bolý qaýpi artyq salmaǵy joqtarmen salystyrǵanda 40%-ǵa artyq.