Koronavırýs ınfektsııasyn boljaý jáne oǵan den qoıý júıesi quryldy - Ajar Ǵınııat

ASTANA. QazAqparat – Bıyl elimizde 25 ınfektsııalyq aýrý jaǵdaılary tirkelmedi. Bul týraly búgin Úkimet otyrysynda QR Densaýlyq saqtaý mınıstri Ajar Ǵınııat aıtty, dep habarlaıdy QazAqparat tilshisi.

«Halyqtyń sanıtarııalyq-epıdemıologııalyq salamattylyǵyn qamtamasyz etý boıynsha is-sharalar iske asyrylýda. Jalpy respýblıkada ınfektsııalyq aýrýlar boıynsha epıdemıologııalyq jaǵdaı turaqty. Osy jyldyń ótken kezeńinde 25 ınfektsııalyq aýrý jaǵdaılary, onyń ishinde tyrysqaq, oba, týlıaremııa, paratıf, ish súzegi, sirespe, dıfterııa, polıomıelıt, qyzamyq boıynsha tirkelgen joq. 2021 jyldyń uqsas kezeńimen salystyrǵanda 12 nozologııa boıynsha syrqattanýshylyqtyń tómendeýine qol jetkizildi», - dedi mınıstr «Deni saý ult» árbir azamat úshin sapaly jáne qoljetimdi densaýlyq saqtaý» ulttyq jobasynyń birinshi jartyjyldyqtaǵy nátıjeleri jaıynda baıandaı kele.

Sonymen qatar ol bıyl 21 mamyrda Memleket basshysy bıologııalyq qaterlerdi erte anyqtaýǵa ýaqtyly den qoıýǵa jáne onyń aldyn alýǵa baǵyttalǵan «Qazaqstan Respýblıkasynyń bıologııalyq qaýipsizdigi týraly» Zańǵa qol qoıǵanyn eske saldy.

«Byltyrdan bastap biz ınfektsııalyq aýrýlardy epıdemıologııalyq qadaǵalaýdyń zamanaýı modeline kóshtik. Koronavırýs ınfektsııasyn boljaý jáne oǵan den qoıý júıesi quryldy. Qazir basqa da ınfektsııalarǵa osy modeldi engizip jatyrmyz. Bıyl biz vaktsınamen basqarylatyn ınfektsııalardy úlgileýge, boljaýǵa jáne den qoıýǵa kiristik», - dedi Ajar Ǵınııat.

Foto: t.me/KZgovernment