Koronavırýs ınfektsııasy: Qytaıdan kelgen jolaýshylar jiti tekserilýde
Bas sanıtar dárigerdiń tapsyrmasymen jolaýshylarǵa arnaıy jadynamalar taratylyp, aýrýdyń aldyn alý sharalary júrgizilýde.
Álemde buryn-sońdy bolmaǵan bul derttiń belgileri qandaı? A tıpti pnevmonııa aýrýy Qytaıdyń Ýhan qalasynda ótken jyldyń sońynda tirkelgen.
Al bizdiń eldegi qoǵamdyq densaýlyq saqtaý qyzmetkerleriniń sózinshe, buryn-sońdy bolmaǵan vırýstyń belgileri qarapaıym tumaýǵa uqsaıdy.
«Bul aýrý buryn adamdarda tirkelmegen koronavırýs. Buny bólip alyp, laboratorııalarda zerttep jatyr. Bul aýrýdyń klınıkalyq kórinisi jalpy respıratorlyq sındrom aýrýlarymen birdeı. Jeńil ǵana túshkirý jótelýden bastalady. Ármen qaraı dene qyzýynyń kóterilýi, aýyr demalý, pnevmonııa óte aýyr jaǵdaılarda ólimge ákeledi», - deıdi QR QDSO juqpaly aýrýlardyń aldyn alý departamentiniń dırektory Jumabek Bekenov.
Mamandar Qytaıdaǵy ınfektsııalyq aýrý janýarlar arqyly nemese teńiz ónimderinen taraldy degen pikirde. Sońǵy derekterge saı aýrýdyń adamnan adamǵa juǵý faktileri tirkelmegen Degenmen, saqtyqta qorlyq joq. Sondyqtan shekarada Qytaıdan kelgen jolaýshylar jiti tekserýden ótedi.
Áýejaıdyń sanıtarlyq-karantındik baqylaý qyzmeti halyqaralyq reıspen kelgen ár jolaýshyny teplovızor arqyly tekseredi. Bul qurylǵy adamnyń dene qyzýyn anyqtaıdy. Eger jolaýshynyń qyzýy joǵary bolsa, ol birden oqshaýlandyrylyp medıtsınalyq tekserýden ótedi. Jalpy jyl basynan beri Qytaıdan Qazaqstanǵa 10 myńǵa jýyq jolaýshy kelgen.
«Qazirgi tańda Qytaı Halyq Respýblıkasynan 28 áýe reısi keledi. Onyń 18-i - Almaty qalasyna, 10 reıs - Nur-Sultan qalasyna keledi. Halyqaralyq reısterge shyǵatyn ekıpaj múshelerine jadynamalar taratyldy. Barlyǵyn osy aýrýdyń aldyn alý joldaryn jáne osy aýrý anyqtalǵan kezde júrgiziletin algorıtmdermen tanystyrdyq», - dep atap ótti QR DSM Kóliktegi taýarlar men kórsetiletin qyzmetterdiń sapasyn baqylaý departamentiniń bólim basshysy Darııa Ázimbaeva.
Qazaqstanda koronavırýs ınfektsııasy tirkelmegen. Alaıda, qazir tumaýdyń órship turǵan kezi. Sáıkesinshe, sýyq tıip, aq halattylardyń kómegine júgingenderdiń sany artqan.
«Tumaýmen aýyratyn aýrýlar maýsym kezinde táýligine 40 adamǵa deıin jetedi. Olardyń 20-25-si bizde aýrýhanaǵa jatqyzylady. Onyń kóbi - júkti áıelder», - deıdi kópbeıindi medıtsınalyq ortalyqtyń ınfektsııa bóliminiń meńgerýshisi Gúljanat Shyrshyqpaeva.