Koronavırýs indeti jeńil túrde ótip jatyr – Densaýlyq mınıstri

NUR-SULTAN. QazAqparat – Búgin Úkimet otyrysynda Densaýlyq saqtaý mınıstri Ajar Ǵınııat koronavırýs indeti jeńil túrde ótip jatqanyn aıtty, dep habarlaıdy QazAqparat tilshisi.

«Búkil álemdegi sııaqty, omıkron VA.5 shtamynan bolǵan COVID-19-dyń kezekti tolqyny bıylǵy shildede elimizde júrgizilgen genetıkalyq zertteý nátıjeleri boıynsha zerttelgen úlgilerdiń 70 paıyzynda anyqtaldy», - dedi Ajar Ǵınııat.

Mınıstrdiń aıtýynsha, koronavırýstyń qazirgi shtamy (Omıkron VA.5) joǵary juqpalyǵymen sıpattalady jáne delta nusqasymen salystyrǵanda áldeqaıda aýrý jeńil ótedi. Bul óz kezeginde naýqastardyń 94 paıyzdan astamy ambýlatorııalyq jaǵdaıda emdeletindigimen de rastalyp otyr.

«Statsıonarlyq em qabyldaıtyn patsıentterge qatysty taldaý júrgizý kezinde 36 paıyzy 18 jasqa deıingi balalar, 64 paıyzy eresekter ekeni, al aýyrǵan adamdardyń 52 paıyzynda qosalqy sozylmaly aýrýlary bar ekeni anyqtaldy», - dedi A. Ǵınııat.

Onyń sózine qaraǵanda, byltyrmen salystyrǵanda KVI-ge qatysty jedel medıtsınalyq kómekti shaqyrtý sany 3,7 ese azaıǵan. Bul kórsetkish te aýrýdyń jeńil túrde ótip jatqanyn aıqyndaıdy.

Budan buryn habarlanǵandaı, mınıstr qyrkúıek aıynda koronavırýstyń taralýy tómendeýi múmkin ekenin aıtty.