Koronavırýs: Hokkeıden álem chempıonaty ótpeıtin boldy

NUR-SULTAN. QazAqparat - Halyqaralyq hokkeı federatsııasy (IIHF) 2020 jylǵy álem chempıonatyn ótkizbeıtinin málimdedi, dep habarlaıdy QazAqparat tilshisi federatsııa saıtyna silteme jasap.

Álem chempıonatynyń top-dıvızıondaǵy oıyndaryna bıyl Qazaqstan quramasy qatysýy tıis bolatyn. Dúbirli doda 8-24 mamyr kúnderi Shveıtsarııada ótkizilý josparlanǵan. Ony uıymdastyrýshylar qazir álem halqyn alańdatyp otyrǵan koronavırýs dertiniń qaýpiniń aldyn alý baǵytynda osyndaı sheshim qabyldady.

Ótken jyly birinshi dıvızıonda jeńimpaz atanǵan Qazaqstan quramasy úsh jyldyq úzilisten keıin top-dıvızıonǵa qaıta oraldy. Qazaqstan bıyl V tobynda Reseı, Fınlıandııa, AQSh, Shveıtsarııa, Latvııa, Norvegııa, Italııa quramalarymen synǵa túsetin.

IIHF budan buryn atalǵan jaǵdaıǵa baılanysty taǵy da tórt jarys ótkizýdi keıinge qaldyrǵan edi.