Koronavırýs halqymyzǵa ǵana emes, memlekettik bılik ınstıtýttary men bıznes úshin de aýyr synaqqa aınaldy - Asqar Mamın
NUR-SULTAN. QazAqparat – QR Premer-Mınıstri Asqar Mamın qazaqstandyqtardy Jańa jylmen quttyqtady, dep habarlaıdy QazAqparat Úkimettiń baspasóz qyzmetine silteme jasap.
***
Qurmetti qazaqstandyqtar, barshańyzdy Jańa 2021 jylmen shyn júrekten quttyqtaımyn! Jańa jyl – ótken jyldy qorytyndylap, tabaldyryqtan endi attaǵan jylǵa jospar qurýǵa jeteleıtin shýaqty mereke.
Adamdardyń kúndelikti ómiri men ekonomıkaǵa aıtarlyqtaı keri áserin tıgizgen 2020 jyl búkil álem elderimen birge bizdiń elimiz úshin de qıyn-qystaý kezeń boldy. Koronavırýs pandemııasy halqymyzǵa ǵana emes, memlekettik bılik ınstıtýttary men bıznes úshin de aýyr synaqqa aınaldy. 2020 jyly qazaqstandyqtar qaýipti indetpen bel sheshe kúresip qana qoımaı, onyń elimizdiń áleýmettik-ekonomıkalyq damýyna áserin barynsha azaıtý boıynsha aýqymdy jumys júrgizdi. Nátıjesinde, Qazaqstan ulttyq ekonomıkasynyń turaqtylyǵy men damýynyń zor áleýetin kórsete otyryp, qıyndyqtardyń barlyǵyn laıyqty eńsere bildi.
Bıyl da aldymyzda elimizdiń áleýmettik-ekonomıkalyq damýyn, qazaqstandyqtardyń ál-aýqaty men ómir súrý sapasyn arttyrý boıynsha aýqymdy ister kútip tur. Óz kúshimizge degen senimdilik, ynta men jaýapkershilik, almaǵaıyp álemdegi ózgerister lebinen qalys qalmaý, jańa quzyretterdi ıgerý, eńbeksúıgishtik pen tabandylyq bizdiń oıǵa alǵan josparlarymyzdy iske asyryp, maqsat-muratymyzǵa jetkizetinine senimdimin!
Qazaqstandyqtarǵa shyn júregimnen myqty densaýlyq, senim men sáttilik tileımin! Shýaqty mereke ár otbasyna jylylyq pen qut-bereke syılasyn!
