Koronavırýs: Grýzııada karantın men oqshaýlaýdyń jańa erejeleri engizildi
TBILISI. NOVOSTI-GRÝZIıA – QazAqparat – Grýzııa úkimeti jańa qaýly qabyldady. Oǵan sáıkes, ınfektsııa juqtyrǵan naýqaspen jaqyn baılanysta bolǵan tulǵalar dereý oqshaýlanýǵa nemese testileýden ótpeı karantınge aýysýy kerek.
Bul týraly eldiń Aýrýdy baqylaý jáne qoǵamdyq densaýlyq saqtaý jónindegi ulttyq ortalyq basshysy Amıran Gamkrelıdze brıfıng barysynda málim etti, dep habarlaıdy QazAqparat «Novostı-Grýzııa» agenttigine silteme jasap.
Ol búgingi kúnde Grýzııada sımptomsyz patsıentter sany 30-dan 40%-ǵa deıin aýytqyp otyrǵanyn habarlady.
Sımptomsyz patsıentter karantın men oqshaýlanýdyń 12 kúni ótkennen keıin qalypty ómir saltyna orala alady. Mundaı jaǵdaıda test te tapsyrmaıdy.
Eger oqshaýlaý kezinde naýqastardyń birinen aýrý belgileri anyqtalǵan jaǵdaıda olar bul týraly dárigerge habarlap, PTR testten ótýi tıis. Eger test oń nátıje kórsetse, patsıent ázirlengen hattamaǵa sáıkes úıge nemese statsıonarǵa jiberiledi.
Budan bólek elge kelgen azamattar úshin de karantın erejeleri ózgerdi. Shetelden kelgender burynǵydaı karantınge jiberiledi, biraq segizinshi kúni olar zerthanaalyq PTR test emes, antıdenege negizdelgen joǵary sapaly «jyldam test» tapsyrady.
Eger test nátıjesi teris bolsa, olar karantınnen shyǵa alady. Al test nátıjesi kúmán týdyrsa, onda zerthanalyq PTR test tapsyratyn bolady.
«Adamdar karantınde nemese oqshaýlaýda bosqa kútip qalmas úshin osyndaı sharalar jasalyp jatyr», — dep atap ótti Gamkrelıdze.
Ortalyq basshysy koronavırýsqa qarsy vaktsına 2021 jylǵy kóktemde qoljetimdi bolady dep sanaıdy.
«Bir ýaqytta jeti mıllıard adamǵa vaktsına salý múmkin emes ekeni anyq. Sondyqtan negizgi basymdyq tıimdi dári-dármekke beriledi», — dedi Gamkrelıdze.
