Koronavırýs: Grýzııada 4 qyrkúıekke deıin qoǵamdyq kólik qozǵalysyna shekteý qoıyldy

NUR-SULTAN. QazAqparat – Grýzııa koronavırýs juqtyrý jaǵdaıy ósip jatqandyqtan búginnen bastap jańa shekteýler engizedi. Oǵan sáıkes, úsh apta boıy elde qalalyq kólikter toqtaıdy, dámhana men meıramhanalardyń jumys saǵaty qysqarady, sondaı-aq festıvalderge tyıym salynady. Bul týraly QazAqparat «Novostı – Grýzııa» portalyna silteme jasap habarlaıdy.

14 tamyzdan 4 qyrkúıekke deıin Grýzııada qalalyq qoǵamdyq kólikter (qalaaralyq kólikterden basqa) qozǵalysyna shekteý qoıyldy, festıvalder, oıyn-saýyq sharalary, kontsertter men sporttyq jarystarǵa (halyqaralyq jarystardan basqa) tyıym salyndy. Balalar oıyn-saýyq ortalyqtarynyń jumysyna shekteý qoıyldy, tamaqtaný nysandary 23:00-ge deıin jumys isteıdi, toı, janaza jáne basqa da sharalar ótkizýge bolmaıdy, baqylaý kúsheıtiledi.

Memlekettik vedomstvolar men jeke kompanııalarǵa óz qyzmetkerlerin qashyqtan jumys isteýge kóshirý tapsyryldy. Qaladaǵy qoǵamdyq kólikterge shekteý qoıylǵandyqtan, vaktsına alatyn mekemelerge turaqty kólikter qatynamaq.

Grýzııa koronavırýstyń tórtinshi tolqynyn ótkerip jatyr. Kún saıyn aýrý juqtyrǵandar sany tórt-bes myń adamǵa artýda. Grýzııada pandemııa bastalǵaly 471 myń jaǵdaı tirkeldi. 415 myńnan astamy emdelip shyqsa, 6321 adam kóz jumdy.