Koronavırýs: Grekııada alǵashqy vırýs juqtyrý jaǵdaıy tirkeldi
AFINA. QazAqparat – Búgin Grekııa koronavırýs juqtyrǵan alǵashqy adam tirkeldi, dep habarlaıdy QazAqparat ekathimerini.com basylymyna silteme jasap.
Basylymnyń málimetinshe, Italııanyń soltústiginen jaqynda ǵana kelgen Salonıkıdegi 38 jastaǵy áıelden vırýs anyqtalǵan. Eldiń densaýlyq saqtaý mınıstrligi onyń otbasy shamamen 14 kúnge karantınge jiberiletinin rastady.
Habarlamada densaýlyq saqtaý ókilderi Afınada densaýlyq saqtaý mınıstri Vasılısa Kıkılıasanyń tóraǵalyǵymen shuǵyl jınalys ótip jatqany aıtylǵan. Mınıstr jınalystan soń Salonıkıge barady.
Sondaı-aq koronavırýstyń órshý jaǵdaıynda el bıligi ýaqytsha mektepterdi, ýnıversıtetterdi, teatr, kınoteatrlardy, sporttyq jáne sýret ortalyqtaryn jabady.
Sonymen qatar Gulf Newshttps sársenbi kúni Kýveıtte koronavırýs juqtyrý jaǵdaılarynyń sany 25-ke jetkenin atap ótken. Tek búginniń ózinde 13 jańa jaǵdaı tirkelgen. Vırýs juqtyrǵandardyń barlyǵy Iranda bolǵan eken.
Kýveıttiń densaýlyq saqtaý mınıstrligi koronavırýs juqtyrǵan barlyq patsıent karantınde, jaǵdaılarynyń turaqty ekenin aıtty.
Dúısenbi kúni Kýveıttiń Azamattyq avıatsııa basqarmasy jańa vırýs órship turǵan Ońtústik Koreıa, Taıland jáne Italııa elderine baratyn jáne keletin ushaqtardy toqtatqany týraly habarlaǵan bolatyn.
Diamond Princess krýızdik laınerinen jaǵymsyz jańalyq keldi, Japonııanyń Densaýlyq saqtaý, eńbek jáne ál-aýqat mınıstrliginiń málimetteri boıynsha, taǵy 14 adam koronavırýsty juqtyrǵan. Kemedegi vırýs juqtyrǵandardyń jalpy sany qazirdiń ózinde 705 adamǵa jetti. Laıner Japonııanyń Iokogama portynda úsh aptadan beri tur.
