Koronavırýs: Germanııanyń barlyq turǵyny maska taǵyp júrýge mindetteldi
BRıÝSSELЬ. QazAqparat – Germanııanyń barlyq federaldy jeri muryn men aýyzdy jaýyp turatyn maska jasap, ony koronavırýstyń taralýyna qarsy kúres úshin qoǵamdyq oryndarda taǵyp júrýdi mindetteý týraly sheshim qabyldady, dep habarlaıdy QazAqparattyń menshikti tilshisi The Local-ǵa silteme jasap.
Maskany eldiń barlyq aýmaǵynda qoǵamdyq kólikte taǵý mindetti. Sondaı-aq, keıbir jerlerde adamdar saýda jasaǵan kezde betin jaýyp júrý kerek. Bremen «maska rejımin» qoldaǵan 16 federaldyq jerdiń sońǵysy boldy.
Germanııada barlyq maska túrlerin, sonyń ishinde qoldan jasalǵandardy da paıdalanýǵa ruqsat etilgen. Sondaı-aq, muryn men aýyzdy jaýyp turatyn sharftardy jáne basqa da zattardy qoldanýǵa bolady.
Aıta keteıik, Germanııanyń Tıýrıngııadaǵy Iena qalasy turǵyndardy qoǵamdyq orynda medıtsınalyq maska taǵýǵa mindettegen GFR-degi alǵashqy qala boldy.
Robert Koh atyndaǵy juqpaly aýrýlardy zertteý ınstıtýtynyń málimetinshe, 22 sáýirdegi jaǵdaı boıynsha Germanııada 145 694 adam koronavırýs juqtyryp, 4879 naýqas qaıtys bolǵan. 99 myń adam emdelip shyqty.
Avtor: Tımýr Dúısekeev
