Koronavırýs: Fılıppın prezıdenti karantın merzimin uzartty
MANILA. QazAqparat – Fılıppın prezıdenti Rodrıgo Dýterte el astanasy Manıla qalasynda karantın merzimin 15 mamyrǵa deıin uzartty. Bul týraly juma kúni onyń ókili Garrı Rok málim etti, dep habarlaıdy QazAqparat Channel News Asia-ǵa silteme jasap.
Onyń aıtýynsha, osyndaı sharalar koronavırýs ınfektsııasy kóp taraǵan basqa aýdandarda da qoldanylady. Іndet juqtyrý qaýpi az aýdandarda karantın sharalary alynady. Osylaısha, kólik qozǵalysy men saýda qaı jerde iske qosylatynyn shamalaýǵa da bolady.
Juma kúni prezıdent Dýterte COVID-19 koronavırýsynyń jańa shtammyna qarsy vaktsına oılap tapqan kez kelgen fılıppındyq azamatqa 50 mıllıon peso (986 000 AQSh dollary) kóleminde syıaqy tóleıtinin aıtty.
El astanasy Manıla – 13 mıllıon halqy bar jáne mıllıondaǵan zańsyz kóship kelýshiler turatyn qala. Sońǵy málimetter boıynsha, qalada indet juqtyrǵandar sany el boıynsha aýrýǵa shaldyqqan 6981 adamnyń úshten bir bóligin quraǵan, 462 ólim oqıǵasy tirkeldi.
Elde koronavırýs juqtyrǵan adamdar sany salystyrmaly túrde kóp bolmaǵanyna qaramastan, Fılıppın eli Qytaı men Italııadan keıin qatań shekteý sharalary men úıdegi karantındi engizgen úshinshi el boldy.
El ishinde koronavırýs anyqtalǵannan beri bes kún ótken soń, 12 naýryzda Fılıppınde kóshi-qon, sapar, saýda oryndaryna, sondaı-aq adamdardyń jınalýyna shekteý engizilgen. Áýe kompanııalary da óz qyzmetin 15 mamyrǵa deıin toqtatady.
Foto: REUTERS/Eloisa Lopez