Koronavırýs Eýroodaqqa qıynǵa soǵady – sarapshylar
NUR-SULTAN. QazAqparat - «Eýroodaq mıgratsııalyq daǵdarys pen «Breksıtten» ótti, degenmen, mamandar koronavırýs saldary odan da qıynǵa soǵady dep boljap otyr» dep jazady The Guardian.
Italııanyń burynǵy premer-mınıstri Enrıko Letta Eýroodaqtyń jahandyq pandemııa kesirinen úlken qaýipke tap bolyp otyrǵanyn aıtty. Basylymnyń jazýynsha, buǵan eýropeızmniń sońǵy on jylda aıtarlyqtaı álsiregeni áser etken.
«Qazirgi strategııa boıynsha memleketter «Aldymen Italııa», «Aldymen Germanııa», «Aldymen Belgııa» dep urandatyp ketti. Degenmen, jahandyq pandemııa kezinde Eýropaǵa birtutastyq kerek. Áıtpese, Eýroodaq qurdymǵa ketedi», - deıdi ol.
Eýroodaqtyń burynǵy syrtqy saıasat komıssary Natalı Tochchı de bul jaǵdaı Eýroodaqtyń aqyry bolýy múmkin ekenin boljap otyr.
«Eýropa basynda «meniń múddem mańyzdy» degen reaktsııa tanytty. Keıin keıbir memleketter medıtsınalyq qurylǵylar eksportyna tyıym salyp, kedendik baqylaý engizgennen keıin, bul Eýropanyń basqa memleketterine qıynǵa soqty. Germanııa, Avstrııa, Lıýksembýrg eń kóp zardap shekken memleketterdiń azamattaryn emdeý úshin aýrýhanalaryn beretin boldy. Frantsııa men Germanııa Italııaǵa maska jiberdi. Degenmen, memleketter ekonomıkaǵa qalaı kómektesý kerek degen máselege kelgende áli de ortaq sheshimge kele almaı otyr», - dep jazady avtor.
Onyń aıtýynsha, burynǵy daǵdarystar memleketter arasyndaǵy ózara senimge selkeý túsirgen. Bul jalpy júıege áser etip, úlken problema týyndaǵan.
«Eýropa koronavırýstyń ekonomıkalyq saldary týraly máselege kelgende eki lagerge bólingen. Frantsııa, Italııa, Ispanııa men taǵy birneshe memleket eýroaımaqtyń qaryzyn ortaq qylyp, koronaoblıgatsııa shyǵarýdy qoldaıdy. Al Germanııa, Avstrııa men Nıderlandy bul ıdeıany qoldamaı otyr. Ótken aptada ótken sammıtte bul másele qarjy mınıstrleriniń quzyryna berildi», - dep jazady basylym.
