Koronavırýs epıdemııasy kóp memleketterde burynǵysha belsendi satyda tur – Hans Klıýge

BRıÝSSELЬ. QazAqparat – Koronavırýs týdyratyn COVID-19 atıpti pnevmonııasy taraǵan eýropalyq óńir elderiniń sany úsh ese artty, al epıdemııa kóp elde burynǵysha belsendi fazada tur. Bul týraly beısenbi kúni ótken onlaın-brıfıngte Dúnıejúzilik densaýlyq saqtaý uıymy Eýropalyq óńirlik bıýrosynyń dırektory Hans Klıýge málimdedi, dep habarlaıdy QazAqparattyń menshikti tilshisi.

«Álem boıynsha vırýs juqtyrý oqıǵasynyń sany segiz mıllıonnan asty. Jalpy indetke shaldyqqandardyń 31 paıyzy men qaıtys bolǵandardyń 43 paıyzy - eýropalyq óńirge tıesili», - dedi Klıýge.

Ol vırýstyń álem boıynsha jarty mıllıonǵa jýyq adamnyń ómirin qıǵanyn atap ótti.

Hans Klıýgeniń aıtýynsha, keı elderde birneshe apta boıy ınfektsııa juqtyrý oqıǵasy tómendep, qazirgi kúni juqtyrý kórsetkishi eýropalyq óńir boıynsha kúnine ortasha alǵanda 17-20 myń jaǵdaıǵa deıin turaqtaǵan.

«COVID-19 epıdemııasy kóptegen elde burynǵysha belsendi satyda. Jappaı karantınnen keıin qalypty ómirdi qalpyna keltirý mańyzdy. Sonymen qatar memlekettik organdar indetti juqtyrý jaǵdaıyn anyqtap, test júrgizip, ınfektsııaǵa shaldyqqandardyń baılanysqan adamdaryn anyqtaý úshin bar kúshin salýy kerek. Bul sharalar jaqyn apta nemese aılarda jańa jappaı karantın engizýdiń aldyn alady», - dep atap ótti ol.

«Bizde bir qaýip dabyly bar: birneshe elde karantınnen keıin mektepter ashylyp, juqtyrý oqıǵasy birden joǵarylap ketti. Sol sebepti biz uqyptylyq tanytyp, shekteýdi alý kezinde asa muqııat bolýymyz kerek. Taǵy da qaıtalap aıtamyn: barlyq elde qaýip burynǵydaı joǵary», - dedi DDSU eýropalyq óńirlik bıýrosynyń basshysy.