Koronavırýs: Elordanyń qaı aýrýhanalarynda qosymsha tósek-oryndary qoıylady
NUR-SULTAN. QazAqparat – Elordada KVI-men kúresý úshin 11 statsıonar uıymdastyryldy. Bul týraly Nur-Sultan qalasy qoǵamdyq densaýlyq saqtaý basqarmasynyń basshysy Tımýr Muratov aıtyp berdi, dep habarlaıdy QazAqparat tilshisi.
«Búginde KVI-men kúresý úshin 11 statsıonar uıymdastyryldy, onyń ishinde 10 ınfektsııalyq, bir karantındik statsıonar («Ramada Plaza» qonaq úıi bazasynda). Qosymsha úsh uıymnyń bazasynda 300 ınfektsııalyq tósek-oryn ashamyz», - dep atap ótti T. Muratov elorda ákimdiginde ótken onlaın brıfıngte.
Spıkerdiń aıtýynsha, alǵashqy 100 tósek-oryn Travmatologııa jáne ortopedııa ınstıtýty bazasynda ashylady. Kelesi 100 oryn Qorǵanys mınıstrliginiń Bas áskerı klınıkalyq aýrýhanasynda belgilenýi múmkin. Taǵy 100 tósek-oryn qajettilik týyndaǵan jaǵdaıda – Otan soǵysy múgedekteriniń ortalyq gospıtalinde qarastyrylýy múmkin.
«Barlyq úsh uıym aldyn-ala daıyndyqtan, tekserýden ótti jáne jumysqa kirisýge daıyn. KVI-men kúresýge arnalǵan statsıonarlar basqa aýrýlary bar naýqastarǵa medıtsınalyq kómek kórsetýge esh kedergi keltirmeıdi. Olar burynǵydaı josparly jáne shuǵyl emderin ala beredi», - dep túsindirdi basqarma basshysy.
Buǵan deıin Tımýr Muratov elordadaǵy epıdemıologııalyq jaǵdaıdy shilde aıyndaǵy aýyr kezeńge teńegen edi.
Koronavırýs ınfektsııasy naýqastarynyń ósimi Naýryz meıramynan keıin baıqaldy. Astanalyq dárigerler men barlyq medıtsınalyq qyzmetkerler qaıtadan eki ese júktemede jumys istep jatyr.
