Koronavırýs: Elordada jumysshylar arasyndaǵy aýrýshańdyq 1,7 esege ósti
NUR-SULTAN. QazAqaparat – Koronavırýspen syrqattanǵandardyń negizgi bóligi, ıaǵnı 43,6%-y eńbekke qabiletti turǵyndar. Bul týraly Ortalyq kommýnıkatsııalar qyzmetinde ótken brıfıngide aıtyldy, dep habarlaıdy QazAqparat tilshisi.
«Dınamıkada 14 jasqa deıingi balalar arasynda jaǵdaılardyń 1,8 esege ósýi baıqalady, ıaǵnı qańtarda - 571, aqpanda - 479, naýryzda - 871, al ósý balalardyń barlyq jas toptarynda baıqalady. Naýqastardyń negizgi bóligi, ıaǵnı 43,6%-y eńbekke qabiletti turǵyndar, jumyssyzdar 22%, mektep oqýshylary 11,3%, al zeınetkerler 11,7%», - deıdi Sanıtarlyq-epıdemıologııalyq baqylaý departamentiniń basshysy, Nur-Sultan qalasynyń bas sanıtarlyq dárigeri Sarhat Beısenova.
Onyń aıtýynsha, naýryzda jumysshylar arasynda aýrýshańdyq 1,7 esege, jumys istemeıtin halyq pen zeınetkerlerdiń aýrýshańdyǵy 1,5 esege, sonymen qatar mektep oqýshylary arasynda 1,6 esege jáne stýdentter 1,5 ese óskeni baıqalady.
Eske sala ketsek, elordada sońǵy úsh kúnde koronavırýspen aýyrǵandar sany 2 ese ósken.
