Koronavırýs: Elordada tegin ekspress testinen qalaı ótýge bolady
NUR-SULTAN. QazAqparat - COVID-19 tegin ekspress testin tapsyrýǵa arnalǵan ótinimdi Smart Astana qosymshasynda toltyrýǵa bolady. Bul týraly elorda ákiminiń orynbasary Málıka Bekturova Telegram-daǵy paraqshasynda málim etti, dep habarlaıdy QazAqparat.
«Ol úshin ne isteý kerek? Birinshiden, siz Smart Astana mobıldi qosymshasyndaǵy «Medıtsına» bóliminde saýalnamany toltyrýyńyz kerek - «COVID-19 testine tirkelý». Ekinshiden, Densaýlyq saqtaý mınıstrliginiń epıdemıologtary azamattardy belgili bir kórsetkishter boıynsha irikteıdi», - dep jazdy M. Bekturova.
Osydan keıingi úshinshi satyda ótinim rastalýyn kútý kerek.
«Tórtinshisi – «KDL OLIMP» operatorlary sizge qońyraý shalyp, emdeý bólmesine barý ýaqyty, orny men kúnin josparlaıdy. Aıtpaqshy, sizge betperde kıip, jeke kýálikpen kirý kerek, óıtkeni kirý tek taǵaıyndalǵan kezde bolady. Besinshisi - taldaý nátıjesi siz saýalnamada kórsetken elektrondyq poshtańyzǵa jiberiledi», - dep túsindirdi qala ákiminiń orynbasary.
