Koronavırýs: Elordada medıtsınalyq kolledj ben akademııa túlekteri naýqastardy emdeýge jiberildi

NUR-SULTAN. QazAqparat – Elordada medıtsınalyq kolledj ben akademııa túlekteri koronavırýs juqtyrǵan naýqastardy emdeýge jiberildi. Bul týraly Nur-Sultan qalasynyń ákimi Altaı Kólginov aıtyp berdi, dep habarlaıdy QazAqparat tilshisi.

«Qazirgi ýaqytta elordada 3,5 myń dáriger, 8 myńǵa jýyq medbıke jumys atqarýda. Qala turǵyndarynyń sany 1,2 mln-ǵa jetkenin eskersek, árıne, dárigerlerge úlken salmaq túsýde. Sondyqtan, dárigerlerge kómek retinde medıtsınalyq oqytý uıymdarymen kelisip, Densaýlyq saqtaý mınıstrligimen birge jospar bekitik. Sol josparǵa sáıkes medkolledjderden 270-ten astam stýdent oqýyn támamdady, dıplomyn aldy jáne arnaıy oqýdan ótip, qazir dárigerlerge kómektesýdi bastap ketti. 15 shildeden bastap, Medıtsınalyq akademııa túlekterin jumysqa alatyn bolamyz, oǵan da sáıkes josparymyz bar», - dedi qala ákimi Ortalyq kommýnıkatsııalar qyzmetinde ótken brıfıngide .

Sonymen birge, medıtsınalyq kadrlardy yntalandyrý jumystary da jalǵasýda.

«Karantın bastalǵan sátten beri 3 mlrd-qa jýyq qarajat dárigerlerge járdemaqy jáne syıaqy túrinde jalaqy ústine qosyldy. Bul jumys ári qaraı jalǵasýda», - dedi A. Kólginov.

Aıta keteıik, Nur-Sultanda koronavırýs ınfektsııasyn 61 adam qaıtys boldy.

Qalada KVI statsıonary 87% toldy.