Koronavırýs: Elordada qaı jastaǵy turǵyndar jıi aýyrady
NUR-SULTAN. QazAqparat – Nur-Sultan qalasynyń bas memlekettik sanıtarlyq dárigeri Sarhat Beısenova elordadaǵy KVI juqtyrǵandardyń jas qurylymyn aıtyp berdi, dep habarlaıdy QazAqparat tilshisi.
«Aýyrǵandardyń eń joǵary deńgeıi burynǵydaı eresekter arasynda tirkelgen, olar jalpy syrqattanýdyń 79,9%-yn quraıdy, balalar úlesi – 17,3% jáne jasóspirimder 2,8%. Eresekter arasynda 30%-y 30-39 jas aralyǵyndaǵy topqa tıesili. Sáýir aıynan bastap egde jastaǵy adamdar arasynda jaǵdaılardyń 2,2%-ǵa, 18-29 jastaǵy adamdar arasynda 0,7% ǵa ósýi baıqalady», - dedi S. Beısenova elorda ákimdiginde ótken brıfıngide.
Naýryzda dınamıkada 14 jasqa deıingi balalar arasynda aqpan aıymen salystyrǵanda 2,3 ese ósý baıqaldy, ıaǵnı aqpanda – 479 jaǵdaı, naýryzda – 1 106 jaǵdaı, sáýirdiń alǵashqy 20 kúninde naýryz aıymen salystyrǵanda 1,3 ese – 1 447 jaǵdaıdyń ósýi baıqaldy.
«Al sáýir aıynda jalpy syrqattaný qurylymyndaǵy balalardyń úles salmaǵy 0,8%-ǵa azaıdy, bul ásirese 7-10 jas aralyǵyndaǵy top oqýshylaryna qatysty qabyldanǵan shekteý sharalarynyń tıimdiligin kórsetedi, onda tómendeý 5%-dan 4%-ǵa deıin boldy. Balalar arasynda eń joǵary aýrýshańdyq 3-10 jas tobynda 54,5%-dy quraıdy», - deıdi spıker.
Syrqattaný qurylymynda aýyrǵandardyń negizgi úlesi jumys isteıtin halyqqa tıesili – 43,6 %, jumys istemeıtinder – 23,4%, zeınetkerler – 15,3 %, oqýshylar – 11,1 %. Bul rette sáýir aıynda jumys isteıtinder arasynda aýyrǵandardyń úles salmaǵy 4,2%-ǵa, jumys istemeıtin halyqtyń 5,5%-ǵa, sondaı-aq oqýshylar arasynda 4%-ǵa tómendegeni baıqalady.
