Koronavırýs: Elordada 20 myńǵa jýyq adam dıagnostıkadan ótti
NUR-SULTAN. QazAqparat – Nur-Sultan qalasynyń qoǵamdyq densaýlyq saqtaý basqarmasynyń basshysy Sáýle Qısyqova JRVI belgileri bar nemese tynys alý joldary boıynsha qandaı da bir aýrýdan seziktengen azamattardy tekserýden ótýge shaqyrdy, dep habarlaıdy QazAqparat tilshisi.
«Qazirgi tańda elordada karantınde 1819 adam jatyr. 16 sáýirdegi jaǵdaı boıynsha, Nur-Sultan qalasyndaǵy observatsııalyq emhanada, atap aıtqanda Jeltoqsan 34 mekenjaıyndaǵy №2 emhanada koronavırýs ınfektsııasy boıynsha zertteýde 966 adam tekserildi. Onyń 28 jaǵdaıynda azamattardyń koronavırýsty juqtyrǵany rastaldy. Sol sebepti qala turǵyndarynan taǵy da ótinerimiz: JRVI-men aýyratyn azamattardyń bári nemese tynys alý joldary boıynsha aýrýdyń bolýynan seziktengen barlyq azamattardy atalǵan emhanaǵa nemese Jeńis 58 mekenjaıyndaǵy Ortalyq jol aýrýhanasyndaǵy pýlmonologııalyq bólimshesi bar provızorlyq statsıonarǵa qaralýdy suraımyz», - dedi Sáýle Qısyqova «Habar 24» arnasynda onlaın rejımde ótken baspasóz máslıhatynda.
Onyń aıtýynsha, Nur-Sultan qalasynda osy ýaqytqa deıin 19 765 adam PTR-dıagnostıkadan, odan bólek 8 716 adam 9-16 sáýiri aralyǵynda ekpres-testileýden ótken. Vırýsqa kúdikti adamdar provızorlyq statsıonarǵa jetkizilgen.
Aıta ketsek, buǵan deıin Sáýle Qısyqova elordada qazirgi tańda koronavırýs ınfektsııasyn juqtyrǵan 9 adam aýyr halde jatqanyn málim etken edi.
