Koronavırýs: Elordada 12 myńnan astam adam ekspress-test tapsyrdy
NUR-SULTAN. QazAqparat – Nur-Sultan qalasy ákiminiń orynbasary Baqtııar Máken koronavırýs ınfektsııasyna qatysty ekspress-testileý jaıynda aıtyp berdi, dep habarlaıdy QazAqparat tilshisi.
«9 sáýirden bastap jappaı ekspress-testileý júrgizý bastaldy, ony 12 752 adam tapsyrdy. Taǵy 41 myń ekspress-test kvota boıynsha arnaıy medıtsına, polıtsııa, Ulttyq ulan qyzmetkerleri, áskerıler, qala tirshiligin qamtamasyz etý júıesi men kommýnaldyq qyzmetterdiń jumysshylary arasynda úlestirildi», - dedi B. Máken Ortalyq kommýnıkatsııalar qyzmetinde.
Onyń sózine qaraǵanda, bul sharalar indetti der kezinde anyqtap, ýaqytyly medıtsınalyq kómek kórsetýge múmkindik beredi.
Budan buryn habarlanǵandaı, qazirgi tańda qalada koronavırýs ınfektsııasynyń 433 jaǵdaıy tirkeldi. 255 naýqas statsıonarlarda jatyr, 207 adam emdelip shyqty, úı karantıninde 2 396 adam bar.
