Koronavırýs: Elorda jáne ózge úsh óńirde anyqtalǵan oqıǵalar boıynsha málimet
16 sáýir, saǵat 12.25-tegi sońǵy málimet boıynsha, Qazaqstanda koronavırýsqa shaldyqqandardyń jalpy sany 1341-ge jetti. Onyń ishinde elordada – 5, Soltústik Qazaqstan oblysynda – 1, Shymkent qalasynda – 3 jáne Batys Qazaqstan oblysynda 5 jaǵdaı jańadan tirkeldi.
Soltústik Qazaqstan oblysynda indet Mamlıýt aýdany Mamlıýtka qalasynyń 52 jastaǵy turǵynynan anyqtaldy. Ol 15 sáýirde Reseı Federatsııasynan kelgen.
«Naýqas shetelden kelgenine baılanysty karantındik statsıonarǵa buǵan deıin jatqyzylǵan bolatyn. Analızder alyndy. PTR zertteý nátıjeleri boıynsha COVID-19 dıagnozy qoıyldy. Ol Birinshi qalalyq aýrýhananyń juqpaly bólimine jatqyzyldy», - delingen aqparatta.
Nur-Sultan qalasynda 31 jastaǵy áıel, 26 jastaǵy - eki jáne 25 jastaǵy bir qyz ınfektsııa juqtyrdy. «Barlyǵy da naýqas adamdarmen baılanysta bolǵan. 37 jastaǵy taǵy bir áıel tekseris barysynda anyqtaldy. Olarmen baılanysta bolǵan adamdardy izdeý júrgizilýde», - delingen resmı málimette.
Shymkentte jańadan tirkelgen 3 naýqastyń barlyǵy qala turǵyndary. «Testileý kezinde KVI juqtyrý qaýpi joǵary medıtsına qyzmetkerleriniń kontıngenti anyqtaldy. PTR dıagnostıkalyq zertteý nátıjeleri boıynsha dıagnoz naqtylandy», - delingen taratylǵan aqparatta.
Al Batys Qazaqstan oblysynda 5 jaǵdaı anyqtaldy. «Bir naýqas dıagnozy buryn rastalǵan naýqastarmen birge RF-dan vahtadan keldi. Ekinshi patsıent baılanysta bolǵandar qatarynan anyqtaldy. Qalǵan úsh naýqas RF-dan keldi. Olar «Tasqala«shekara beketinde RF-dan kelgenderge monıtorıng júrgizý barysynda anyqtaldy. Qazirgi ýaqytta barlyǵynyń jaǵdaıy - qanaǵattanarlyq. Bekitilgen hattamaǵa sáıkes tıisti emdeý júrgiziledi. Olarmen baılanysta bolǵan adamdar anyqtalyp, medıtsınalyq baqylaýǵa alyndy. Aýrý oshaqtarynda dezınfektsııalyq jumystar júrgiziledi», - delingen baspasóz habarlamasynda.