Koronavırýs: Elorda statsıonarlarynda naýqastar sany 10 esege azaıdy
NUR-SULTAN. QazAqparat – Nur-Sultan ákimi Altaı Kólginov JRVI kezeńi men koronavırýstyń jańa tolqynyna qalanyń daıyndyǵy týraly aıtyp berdi, dep habarlaıdy QazAqparat tilshisi.
«Medıtsınalyq ınfraqurylymǵa toqtalsaq, sanıtar dárigerler boljamyna ári halyqaralyq tájirıbege sáıkes, kúzdegi JRVI kezeńinde aıryqsha saq bolý kerek. Sebebi JRVI kezeńi COVID-19 vırýsynyń taralýymen ýshyǵyp ketpeýi qajet. Bul, endi qoǵamnyń árbir múshesiniń tártibine baılanysty», - dedi elorda ákimi «Astana» telearnasyna bergen suhbatynda.
Sonymen qatar ol qaladaǵy densaýlyq saqtaý nysandaryna qajetti quraldar men apparattar satyp alynǵanyn jetkizdi.
«Osynyń barlyǵy bizdiń dárigerler men barsha medıtsınalyq ınfraqurylym JRVI maýsymyna daıyn bolýy kerektigin kórsetip otyr. Karantındik sharalar indettiń taralýyn aıtarlyqtaı tómendetti, statsıonarlardaǵy patsıentter sany 10 esege jýyq azaıdy», - dedi ákim.
Onyń aıtýynsha, indettiń taralýy deńgeıi joǵary kezeńde statsıonarlarda bir mezgilde 4 myńnan astam adam boldy. Qazirgi kezde 380-ge jýyq adam bar. Pnevmonııamen aýyrǵandar sany 12 esege azaıdy.
