Koronavırýs: Eki aıda Qytaıdyń syrtqy taýar aınalymy 9,6 paıyzǵa tómendedi
Vedomstvonyń saıtynda jarııalanǵan málimetke qaraǵanda, 2020 jyldyń alǵashqy eki aıynda eldiń eksporty 15,9 paıyzǵa azaıyp, 294,2 mlrd dollardy qurady. Import 2,4 paıyzǵa, 299,9 mlrd dollar mejesine deıin qysqardy.
«Syrtqy taýar aınalamynyń tómendeýine negizinen koronavırýs pen jańajyldyq demalysty uzartý faktorlary yqpal etti», - delingen qytaılyq kedenniń málimdemesinde.
Statıstıkalyq derekterge súıensek, atalǵan merzimde Qytaıdyń syrtqy taýar aınalymy EO, AQSh jáne Japonııa sekildi dástúrli saýda seriktesteri arasynda azaıǵan. Sonymen birge, ASEAN-men eksporttyq-ımporttyq operatsııalardyń 2 paıyzǵa óskeni belgili boldy.
Munymen qosa, 24-29 aqpan aralyǵynda qytaılyq keden shetelden kiretin epıdemııaǵa qarsy quraldardy kedendik rásimdeý sharalaryn jedeldetti. Tek bir aptada kedendik rásimdeýden epıdemııanyń aldyn alýǵa arnalǵan 2,46 mlrd dana ónim ótti. Onyń jalpy quny 1,18 mdrd dollarǵa baǵalandy. Atalǵan merzimde Qytaıǵa shetelden 2,2 mlrd qorǵanys maskasy kirgizildi.
Jalpy, ótken táýlikte (6 naýryzdaǵy saǵat 24:00-degi jaǵdaı boıynsha) qurlyqtyq Qytaıda jańa koronavırýsti juqtyrýdyń 99 oqıǵasy tirkeldi, sondaı-aq 28 adam kóz jumdy. Іndetten emdelip, aýrýhadan 1 678 adam shyǵaryldy.