Koronavırýs: Dezınfektsııa jumystaryna QR Qarýly Kúshteri jumyldyryldy

NUR-SULTAN. QazAqparat – Qazaqstanda tótenshe jaǵdaıdyń jarııalanýyna baılanysty QR Qarýly Kúshteriniń bıologııalyq qorǵaý bólimsheleri nysandarǵa dezınfektsııa júrgizýde. Bul týraly Ortalyq kommýnıkatsııalar qyzmetindegi baspasóz máslıhatynda aıtyldy, dep habarlaıdy QazAqparat tilshisi.

«QR Qarýly kúshteriniń jeke quramy tótenshe jaǵdaıdy qamtamasyz etýge belsendi qatysýda. Memleket basshysy azamattardyń densaýlyǵyn qorǵaý jáne zańdy quqyqtaryn saqtaý týraly tapsyrma berdi. Aldyn ala ázirlik qajetti kúshter men quraldardy mobılızatsııalaýǵa jáne daıyndyq kúıine keltirýge múmkindik berdi. Koronavırýs ınfektsııasynyń taralý qaýpiniń aldyn alý úshin qarýly kúshterdiń bıologııalyq qorǵaý bólimshesi arnaıy tehnıkany qoldana otyryp terrıtorııalar men nysandarǵa dezınfektsııa jasaýǵa kiristi», - deıdi QR Qorǵanys mınıstriniń orynbasary Tımýr Dándibaev.

Ol áskerı medıtsınalyq mekemeler azamattardyń densaýlyǵyn qorǵaý úshin qajetti kómek kórsetýge daıyn ekenin aıtty.

«Bul úshin dárigerlik 24 top quryldy. QR Densaýlyq saqtaý mınıstrligimen baılanys ornatyldy. Áskerı qyzmetshiler ishki ister organdarymen birlesip eldi mekender men Nur-Sultan, Almaty qalalaryndaǵy karantındi aýmaqtarda blok-posttardy kúzetýde. Bul sharalar koronavırýstyń elimizde taralýynyń aldyn alady. Qarýly Kúshter qoldanatyn sharalarǵa túsinistikpen qaraýǵa shaqyramyz», - deıdi ol.