Koronavırýs: Densaýlyq mınıstrligi Máskeý, Varshava men Frankfýrttan kelgen jolaýshylardy izdestirip jatyr

NUR-SULTAN. QazAqparat - Germanııadan, Reseıden jáne Polshadan Qazaqstanǵa ushyp kelgen ushaqtardyń jolaýshylaryna 1406 nemese 103 nómirine qońyraý shalýǵa ótinish jasaldy, dep habarlaıdy QazAqparat tilshisi.

«Osy jyldyń 10 naýryzynda saǵat 02:45-te Frankfýrt-Nur-Sultan-Almaty baǵytynda ushyp kelgen №0646 reıstiń jolaýshylarynan 1406 nemese 103 nómirlerine qońyraý shalýlaryn ótinemiz. Aýrýǵa shaldyqqandar sany - 1 adam. Ol medıtsına qyzmetkerleriniń qatań baqylaýymen karantınde jatyr», - delingen QR DSM Taýarlar men qyzmetterdiń sapasyn jáne qaýipsizdigin baqylaý komıtetiniń Telegram paraqshasyndaǵy habarlamada.

Sondaı-aq, 12 naýryz kúni saǵat 06:10-da «Máskeý-Nur-Sultan» baǵytynda qatynaǵan №SU-1956 reısiniń jáne 10 naýryz kúni Varshava-Nur-Sultan baǵytyndaǵy №195 reısiniń jolaýshylary da 1406 nemese 103 nómirlerine habarlasýlary qajet.