Koronavırýs: DDSU qyzmetkerleriniń arasynda aýrýdyń órshýi jáne aýyz shaıýdyń paıdasy týraly
LONDON. QazAqparat – COVID-19 vırýsy Dúnıejúzilik densaýlyq saqtaý uıymynyń shtab-páteri qyzmetkerleriniń arasynda taraı bastady. Uıym basshysy bolsa, vaktsınanyń jyldam áserine senbeıtinin jetkizdi.
Osy arada, Kardıff ýnıversıtetiniń ǵalymdary aýyz shaıýǵa arnalǵan jalpyǵa ortaq zattar silekeıdegi koronavırýsty óltiretinin baıqady, dep habarlaıdy QazAqparat VVS agenttigine silteme jasap.
DDSU Jeneva qalasyndaǵy shtab-páterde óz qyzmetkerleriniń arasynda COVID-19 vırýsyna shaldyqqan 65 adamnyń anyqtalǵanyn málimdedi.
Sonymen birge, uıym basshysy Tedros Adhan Gebreıesýs álemdegi kóp adam úmit artyp otyrǵan otyrǵan vaktsına pandemııany túbimen joımaıtynyn málimdedi.
Onyń pikirinshe, vaktsına jyldam áser etpeıdi.
Gebreıesýstyń aıtýynsha, vaktsına eń aldymen medıtsına qyzmetkerleri, áleýmettik qyzmetkerler, oqytýshylar jáne qaýip tobyna kiretin adamdarǵa egiledi. Osy aralyqta vırýs emin-erkin taraı beredi. Sondyqtan vaktsına paıda bolǵanymen, shekteý sharalary áli uzaq ýaqyt qoldanylýy tıis.
Eýropa sharalardy qatańdatty
Ispanııa sottaryna el bıligi men densaýlyq saqtaý salasyna kóptegen shaǵym túsirilgen. Shaǵymdanýshylar memlekettik qurylymdardy koronavırýspen kúres júrgizý kezinde basqa da aýyr dertterge, kóbine onkologııaǵa shaldyqqan adamdardyń medıtsınalyq kómeksiz qalǵany úshin aıyptap otyr.
Pandemııa bastalǵanda Ispanııa Eýropa elderi arasynda vırýstan eń kóp zardap shekken elderdiń biri boldy.
Djon Hopkıns ýnıversıtetiniń málimetinshe, elde aýrýǵa shaldyqqan adamdardyń jalpy sany 1,5 mıllıonǵa jýyqtaǵan, al qaıtys bolǵandar sany – 41,2 myń adam.
Germanııa kantsleri Angela Merkel 16 federaldyq aımaqtyń basshylary onyń epıdemııany ustap turý boıynsha budan da qatań sharalar engizý áreketterine qarsylyq tanytyp otyrǵanyn málimdedi. Lokdaýndy qatańdatý máselesin talqylaý qaıtadan keıinge qaldyrylǵan, bul joly 25 qarashaǵa deıin.
Bul kóbine aldaǵy qys mezgiline baılanysty boldy. Keıbir aımaqtyń bıligi taý shańǵysy kýrorttary men shana joldaryn jabý onsyz da zardap shekken ekonomıkaǵa taǵy soqqy tıgizetininen qaýiptenip otyr.
Sonda-aq Merkel mektepterde mindetti túrde maska taǵýdy engizip, synyptardaǵy oqýshylar sanyn qysqartýdy usynǵan. Kantslerdi bárinen buryn Berlındegi jaǵdaı alańdatyp otyr. Nemis bıliginiń aıtýynsha, epıdemııanyń ekinshi tolqynyn bara-bara baqylaýǵa alý múmkin boldy, biraq aýrýǵa shaldyǵýdyń táýlik saıynǵy kórsetkishteri áli de joǵary bolyp, úreı týdyryp otyr.
Avstrııada seısenbiden bastap 6 jeltoqsanǵa deıin mektepter men azyq-túlik satpaıtyn dúkender jabylýda. Ótken demalys kúnderi eldiń federaldyq kantsleri Sebastıan Kýrts bul shara epıdemııanyń ekinshi tolqynyn ustap qalýǵa qajetti shara ekenin málimdegen.
Ulybrıtanııa úkimeti eldiń halyqaralyq gýmanıtarlyq kómekke jumsaıtyn shyǵyndaryn ýaqytsha qysqartý múmkindigin qarastyryp otyr.
Osy arada, Shotlandııa úkimeti seısenbi kúni eldiń batysyndaǵy 11 aýdanda, sonyń ishinde Glazgo qalasynda shekteý sharalarynyń qatańdatylatynyn jarııalady. Jumadan bastap onda azyq-túlik satpaıtyn dúkender, ishimdik ishetin oryndar, sporttyq zaldar jabylady.
AQSh – aýrýǵa shaldyqqandar men odan qaıtys bolǵandar sany jaǵynan álemde kósh bastap otyr (tıisinshe 11,2 mln adam jáne 247,8 myń adam). Ótken aptanyń ishinde ǵana elde taǵy bir mıllıon adam vırýsqa shaldyqqan. Osy aptada Amerıka bıligi eń qatty zardap shekken shtattarǵa antıdenelerdi anyqtaıtyn 7 mln astam testini jiberedi, olar birinshi kezekte hospıstar, qarttar úıleri jáne ózge de áleýmettik osal toptardyń arasynda úılestiriledi. Jergilikti bılik turǵyndardy Alǵys aıtý kúnin kópshilik arasynda atap ótýden bas tartýyn surap otyr.
Aýyz shaıýǵa arnalǵan suıyqtyq koronavırýsty óltiredi
Brıtanııanyń Kardıff ýnıversıtetinde ótkizilgen jańa zertteý aýyz shaıýǵa arnalǵan kópshilikke qoljetimdi suıyqtyqtardyń olardy qoldanǵannan keıin 30 sekýnd ishinde vırýsty óltire alatynyn kórsetti. Zerthanalyq zertteý aýyz qýysyn shaıýǵa arnalǵan suıyqtyqtyń silekeıdegi koronavırýsty óltire alatynyn kórsetti. Sonymen birge onyń emdik qural retinde tıimdiliginiń dálelderi de joq, sebebi ol tynys alý joldaryna da, ókpege de barmaıdy.
