Koronavırýs: DDSU Eýropaǵa alańdaýly

NUR-SULTAN. QazAqparat – Koronavırýs Eýropany qatty qysymǵa alyp otyr. Búginde qurlyqta adam ólimine birinshi sebep – osy COVID-19 vırýsy. Dúnıejúzilik Densaýlyq saqtaý uıymynyń aımaqtyq bıýrosynda Eýropada aǵymdaǵy betalys saqtalsa, aldaǵy jyldyń naýryz aıyna qaraı kovıdten bolǵan asqynýdan qaıtys bolǵandar sany eki mıllıonnan asatynyna alańdap otyr, dep habarlaıdy QazAqparat euronews agenttigine silteme jasap.

«Aldymyzda kúrdeli qys tur, biraq úmitimizdi úzbeýimiz kerek, sebebi barlyǵymyz – úkimetter, densaýlyq saqtaý organdary, árqaısymyz epıdemıologııalyq jaǵdaıdy turaqtandyrý úshin batyl sharalar qabyldaı alamyz», - dep jazdy Twitter-de DDSU Eýropaalyq bıýrosynyń dırektory Hans Klıýge.

Koronavırýstyń jyldam taralýyna úsh faktor áser etýde. Birinshiden, Eýropada óte juqpaly delta-nusqasy basym bolýda. Ekinshiden, birqatar elderde shekteýler jeńildetilgen. Al úshinshiden, kóptegen eýropalyqtar áli de vaktsına saldyrtpaǵan.

DDSU turǵyndarǵa ekpeni belsendirek salýdy keńes etedi. Sondaı-aq, vırýstyń aldyn alý sharalary: maska taǵý, qol jýý, bólmelerdi jeldetip otyrý, qashyqtyqty saqtaýdy umytpaý týraly keńes etilýde.