Koronavırýs: Dárilermen eksperıment jasaldy – japon sarapshysy
Onyń aıtýynsha, qoǵamdyq densaýlyq saqtaý júıesiniń ahýaly koronavırýstyń taralýynyń aldyn alýda basym ról oınaıdy.
Norıo Omagarı basqaratyn ortalyq ınfektsııalyq aýrýlardy jahandyq dárejede aldyn alý, emdeý, zertteýmen aınalysady.
Japonııa vırýspen betpe-bet kelgen elderdiń alǵashqysy ekeni ras.
Sebebi, vırýs Qytaı shekarasynan tarala bastaǵan kezde alǵashqylardyń biri bolyp Japonııaǵa toqtaǵan Diamond Princess krýız laıneriniń jolaýshylarynan tabyldy.
Sarapshy qańtar aıynyń sońynda Ýhan qalasynan japon azamattaryn qalaı aldyrǵandaryn eske túsirdi.
Japon ortalyǵy evakýatsııalanǵan 600 adamnyń densaýlyǵyn tekserdi. Olardyń 2 paıyzy koronavırýsty juqtyrǵan bolyp shyqty.
Onyń artynan Iokogama qalasyna Diamond Princess krýız laıneri kelip karantınge toqtady.
«Juqtyrǵan patsıentterdi gospıtalge jatqyzǵannan bastap biz vırýs týraly tyń zertteý júrgize bastadyq. Naýryz aıynyń aıaǵynda Japonııada vırýs juqtyrǵandar sany kúrt óse bastady. Tokıo gýbernatory qalaǵa lokdaýn engizý týraly sheshim qabyldamaq boldy. Alaıda Japonııa eliniń zańdary boıynsha lokdaýn engizýge tyıym salynǵan. Lokdaýn engizilgen joq, biraq halyq ózderi úıde qalýdy durys dep tapty. Syrtqa qajettilik bolmasa eshkim shyqpady. Japon halqynyń bul áreketiniń arqasynda vırýstyń juǵýy kúrt azaıdy. 7 sáýirde Úkimet densaýlyq saqtaý júıesine júktemeni azaıtý úshin tótenshe jaǵdaı jarııalady. Tótenshe jaǵdaı rejımi 25 mamyrda alyndy. Qazir Japonııada epıdemıologııalyq ahýal turaqty», - dedi Norıo Omagarı.
Qazir Japonııada vırýs juqtyrǵandar sany 93408 adamǵa jetti.
Naýryz aıynan beri 1600 adam kóz jumǵan. Olardyń kópshiliginde qant dıabeti, onkologııa, júrek qan tamyrlary syndy qosalqy aýrýlary bolǵan.
Japon sarapshylary qaza bolǵan azamattardyń ortasha jasy 70-ten asqan degen qorytyndyǵa keldi.
«Qazir elde 60 jastan asqan azamattardy qorǵaý týraly strategııa qarastyrylyp jatyr. Osynyń arqasynda biz koronavırýstan bolatyn ólim-jitim kórsetkishin azaıtatyn bolamyz», - dedi maman.
Japon ortalyǵynyń dırektory Diamond Princess krýız laıneriniń jolaýshysy, AQSh azamaty týraly da aıtty.
«Jolaýshy aýyr halde tústi. Naýqasta joǵary tynys joldarynyń respıratorlyq ınfektsııasy sımptomdary bolǵan. Koronavırýs taldaýy oń nátıje kórsetti. 10-kún bolǵanda patsıentke ókpeni jasandy jeldetý apparaty kerek boldy. Ol kezde biz emdeý týraly kóp aqparat bilmeıtinbiz. Qandaı dárini bersek bolady degen úlken suraq turdy. Dárilermen eksperıment jasaldy. Intýbatsııadan keıin 3 aptanyń ishinde jaǵdaıy jaqsardy. Jalpy alǵanda AQSh azamatyna qalpyna kelý úshin, tolyq jazylý úshin 3 aı ýaqyt ketti. Jazylǵan patsıent AQSh-qa úsh aıdan soń oraldy», - dedi Norıo Omagarı.
Buǵan deıin S.Asfendııarov atyndaǵy Qazaq ulttyq medıtsına ýnıversıteti ótkizgen onlaın konferentsııa barysynda Jańa Zelandııanyń Vellıngton qalasyndaǵy Otago ýnıversıtetiniń professory Maıkl Beıker COVID-19-ben kúreste birinshi medıtsınalyq-sanıtarlyq kómek júıesi qalaı uıymdastyrylǵanyn málim etken bolatyn.
Sonymen qatar, AQSh-taǵy Densaýlyqty baǵalaý jáne kórsetkishter ınstıtýtynyń dırektory Krıstofer Mıýrreı COVID-19 boıynsha Qazaqstanǵa qatysty boljamyn aıtqan edi.
