Koronavırýs: Brıtandyq shtamnyń negizgi belgileri jarııalandy

LONDON. QazAqparat - Koronavırýstyń brıtandyq dep atalyp ketken jańa shtamyna jótel, qatty sharshaý, tamaq pen bulshyqettiń aýyrýy sııaqty belgiler tán. Biraq ıis sezgishtiktiń joǵalýy burynǵy nusqasyna qaraǵanda qatty baıqalmaıdy. Ulybrıtanııanyń Ulttyq statıstıka basqarmasy osyndaı toqtamǵa kelip otyr, dep habarlaıdy QazAqparat VVS silteme jasap.

Vedomstvonyń qorytyndylary Anglııada kezdeısoq tańdalǵan, COVID-19 dıagnozy qoıylǵan 6 myń adamǵa qatysty málimettiń óńdelýinen jasalǵan.

Iis pen dámdi joǵaltý sııaqty belgiler jańa shtamda azyraq kezdesedi. Biraq bul shtamda áli de aýrýdyń negizgi úsh belgisi bar. Olar: dene qyzýy, turaqty jótel jáne dám sezimtaldyǵynyń ózgerýi.

Іndet juqtyrǵan adamdardyń kópshiliginde osy úsh belginiń kem degende bireýi anyqtalǵan.

Aıta ketsek, koronavırýstyń jańa shtamy alǵash ret Kent graftyǵynda tirkelgen edi. Jańa shtamnyń bastapqy vırýsqa qaraǵanda taralý qabileti jyldamyraq. Ol Ulybrıtanııanyń barlyq aımaǵynan anyqtaldy. Jańa ınfektsııany juqtyrǵandardyń sanynyń kúrt ósýine baılanysty ondaǵy bılik kúndelikti lokdaýn engizýge májbúr boldy.

Bul shtamnyń ólimge aparar qaýpi joǵaryraq dep aıtýǵa negiz bar. Áıtse de muny rastaıtyn ǵylymı negiz áli joq. Brıtanııada sonymen qatar Ońtústik Afrıka men Brazılııadan jetken jańa shtamdar da anyqtalǵan. Alaıda olarǵa qatysty jekelegen jaǵdaılar ǵana tirkeldi. Statıstıkalyq vedomstvo qyzmetkerleri jańa Covid-19 shtamymen túsken naýqastardyń boıyndaǵy aýrý belgilerin bir apta boıy taldady. Olardy «bastapqy» shtamdy juqtyrǵandarmen salystyrdy. 2020 jyldyń qarasha aıynyń ortasynan bastap 2021 jyldyń qańtar aıynyń ortasyna deıin aýyrǵan adamdardyń nátıjeleri eskerildi. Derekter jańa shtamnyń birinshi jaǵdaıda sııaqty úsh emes, eki genmen úılesetindigin kórsetken. Jańa shtamdy juqtyrǵan 3,5 myń adamnyń ishinde 35% jótelse, 32%-yn sharshańqylyq basqan. 25%-nyń bulshyq etteri men búkil denesi aýyrsynyp, shaǵymdanǵan. Al 21,8%-nyń tamaǵy aýyrdy.

Eske salsaq, koronavırýstyń jańa shtamy týraly tolyq málimetterdi myna jerden kórýge bolady. Ázirge Qazaqstanda mundaı shtamy bar aýyrý belgileri tirkelgen joq.

Densaýlyq saqtaý mınıstri Alekseı Tsoı Qazaqstanda koronıvırýstyń anyqtalýy múmkin shtamdaryna kún saıyn molekýlıarlyq-genetıkalyq zertteý jumystary júrgizilip jatqanyn aıtty.