Koronavırýs: Brazılııa qytaılyq vaktsınany synaqtan ótkizýdi toqtatty, Italııada jappaı karantın máselesi talqylanýda
LONDON. QazAqparat – Brıtan bıligi jeltoqsanda jappaı vaktsınalaýdy bastaýdy josparlap otyr, oǵan 150 mln fýnt qarajat bólmek, Brazılııa qytaılyq vaktsınany synaqtan ótkizýdi toqtatty, Lıvanda qaıtadan lokdaýn engizilýde, danııalyq bılik barlyq kúzendi joıýdy talap etýge quqyǵy joq ekenin moıyndady. Bul týraly QazAqparat VVS-ge silteme jasap habarlaıdy.
Brıtan bıligi el turǵyndaryn jappaı vatsınalaýǵa emhanalarǵa 150 mln fýnt qarjy (200 mln AQSh dollaryna jýyq) bóledi. Ol jeltoqsan aıynda bastalýy múmkin. Bul týraly eldiń ishki ister mınıstri Mett Henkok habarlady.
Bir kún buryn, aldyn ala nátıjelerge sáıkes, Pfizer jáne BioNTech kompanııalary jasaǵan vaktsına koronavırýstan 90% qorǵaıtyny belgili boldy. Bul – testileýdiń sońǵy kezeńindegi 11 vaktsınanyń biri. Ulybrıtanııa osy vaktsınanyń 40 mıllıon dozasyna tapsyrys berdi.
Mınıstr VVS-ge bergen suhbatynda vaktsınatsııa eń aldymen qarttar úıinde bolatynyn, sondaı-aq osy maqsatta sport zaldary sııaqty iri ortalyqtar men demalyssyz jumys isteıtin emhanalar qoldanylatynyn aıtty.
Brazılııa bıligi qytaılyq Coronavac vaktsınasyn klınıkalyq synaqtan ótkizýdi toqtatty. Muny eriktilerdegi aýyr janama áserlerdiń bolýymen túsindirdi.
Senbide Lıvanda eki aptaǵa jańa lokdaýn engizildi, onyń kómegimen bılik koronavırýstyń taralýyn toqtatady dep úmittenedi. Lıvan Úkimeti basshysynyń aıtýynsha, el qaýipti jolaqqa jaqyndady. El turǵyndaryna úndeý kezinde premer-mınıstrdiń mindetin atqarýshy Hasan Dıab «Jeke jáne memlekettik aýrýhanalar endi aýyr naýqastardy qabyldaı almaıdy», - dedi.
Pandemııa bastalǵannan beri elde 95 myńnan astam koronavırýs juqtyrý jaǵdaıy tirkeldi, 732 adam qaıtys boldy.
Danııa bıligi qarakúzenderde koronavırýstyń mýtatsııalyq shtammy anyqtalǵanymen fermalardaǵy barlyq qarakúzendi jappaı qyryp-joıý týraly ókim berýge zańdy negizderi joq ekenin moıyndady.
Fermerler bul janýarlarda aýrý juqtyrýdyń alǵashqy jaǵdaılary anyqtalǵannan keıin qazan aıynyń sońynda qarakúzenderdi joıýdy bastaǵan bolatyn.
Danııa qarakúzen terisin óńdeýshi iri memleketterdiń biri.
Italııada koronavırýstyń taralýyna baılanysty taǵy tórt aımaqqa «qyzǵylt sary» nemese «qyzyl» mártebe berilýi múmkin. Bul Kampanııa, Emılııa-Romanıa, Veneto jáne Frıýlı-Venetsııa-Djýlııa. Toskana, Ýmbrııa, Bazılıkata, Lıgýrııa jáne Abrýtstso «qyzǵylt sary» mártebege ıe bolady. Sársenbiden bastap meıramhanalar tolyǵymen jabylady, al aımaqtardyń turǵyndary ózderi turatyn qaladan kete almaıdy.
Bılik búkil el boıynsha lokdaýndy engizý múmkindigin talqylaýda jáne bul týraly sheshim 15 qarashada qabyldanýy múmkin. Seısenbide Italııada 35 myńnan astam koronavırýs juqtyrýdyń jańa jaǵdaıy anyqtaldy, 580 adam qaıtys bolǵan.
