Koronavırýs boıynsha álemdegi ahýal
Tokıodaǵy 6 myńǵa jýyq dáriger qaladaǵy koronavırýstyń tórtinshi tolqynyna baılanysty Olımpıada oıyndaryn ótkizbeýge shaqyrdy. Osydan bir apta buryn japondyq klınıkalardyń dárigerler toby Olımpıadany qaýipsiz ótkizý múmkin emestigin málimdedi. Japonııa turǵyndarynyń basym bóligi de bul sharany keıinge qaldyrýdy jaqtady. Eldegi 47 prefektýranyń 9-ynda tótenshe jaǵdaı mamyr aıynyń sońyna deıin jarııalandy. 125 mıllıonnan astam japondyqtyń tek úsh paıyzy ǵana vaktsınatsııanyń birinshi dozasyn aldy, aýrýhanalar tolyp, dárigerler júktemesi arta tústi.
Berlındegi memlekettik murajaılar 21 mamyrdan bastap kópshilikke esigin qaıta aıqara ashatyndaryn málimdedi. Murajaılarǵa kirýge PTR test jáne sol kúni alynǵan ekspress-testiń teris nátıjesi bolǵanda, sondaı-aq FFP2 qorǵanys maskasy jáne aldyn ala brondalǵan ýaqytqa bılet alynǵan kezde ǵana ruqsat beriledi.
Ispanııada júrgizilgen Combivacs zertteýinen keıin anyqtalǵandaı, Astrazeneca vaktsınasynyń birinshi dozasynan keıin Biontech/Pfizer vaktsınasynyń ekinshi dozasyn alý qaýipsiz jáne tıimdi. Ǵalymdar Astrazeneca preparatynyń eki dozasyn alǵandarda ımmýndyq jaýap 30-40 ese joǵary ekenin tirkedi. Sonymen qatar zertteýge qatysqan 600 adamnyń tek biren-saranynda eleýli janama áserler baıqalǵan. Birqatar eldiń bıligi tromboz qaýpiniń joǵarylaýyna baılanysty Astrazeneca preparatyn Biontech/Pfizer nemese Moderna vaktsınasymen biriktirýdi usynady. Germanııada bul 60 jasqa deıingi turǵyndarǵa qatysty júzege asyrylady.
Resmı málimetterge sáıkes Máskeýdegi COVID-19 boıynsha kúndelikti aýrýshańdyq kórsetkishi 2430 jaǵdaıǵa deıin tómendegen. Bul bir kún burynǵy málimetke qaraǵanda 1 myń adamǵa az, dep habarlady Koronavırýs ahýalyn baqylaý jónindegi jedel shtab. Aıta ketý kerek, bul 6 mamyrdan bastap tirkelgen Máskeýdegi eń tómengi kórsetkish.
