Koronavırýs boıynsha álemdegi ahýal: Ulybrıtanııada 10 myń adam qaıtys boldy
LONDON. QazAqparat – Jeksenbi kúni Brıtanııa aýrýhanalarynda koronavırýstan qaıtys bolǵandar sany 10 myń adamnan asty. Bul, qarttar úıinde nemese óz úıinde Covid-19-dan kóz jumǵandardy qospaǵandaǵy málimet, dep habarlaıdy QazAqparat VVS-ge silteme jasap.
Jeksenbi kúngi derekter boıynsha, Anglııada - - 657, Shotlandııada 24, Ýelste - 18, Soltústik Irlandııada 11 adam qaıtys bolǵan.
Premer-mınıstr Borıs Djonson aýrýhanadan shyǵaryldy. Biraq ol dárigerlerdiń usynysy boıynsha jumysyna ázirge kirispeı, premer-mınıstrdiń qala mańyndaǵy Chequers resmı rezıdentsııasynda saýyǵýdy jalǵastyrady.
DDU-nyń sońǵy málimetterine sáıkes, dúnıejúzinde Covid-19 juqtyrǵandar sany 1,7 mln-ǵa jýyqtady, shamamen 106 myń adam kóz jumdy. Vırýs juqtyrý jaǵdaıynyń eń kóbi Eýropada tirkelgen. 880 myńnan astam adam koronavırýs juqtyrǵan.
Djons Hopkıns ýnıversıtetiniń aqparaty boıynsha, qazirgi ýaqytta Eýropa elderi arasynda koronavırýstan ólim Italııada eń kóp tirkelgen. Munda 19 myń adam kóz jumǵan. Odan keıingi oryndarda – Ispanııa, Frantsııa jáne Ulybrıtanııa tur.
Germanııada bıliktiń qolǵa alǵan sharalarynyń arqasynda qaıtys bolǵandardyń sany 3 myńnan aspaıdy. Germanııada aýrýhanalarǵa kelip túsetin patsıentter sany Brıtanııaǵa qaraǵanda tómen bolýynyń sebebi ótkizilip jatqan testileýdiń aýqymymen baılanysty ekendigi atap ótilýde.
Brıtandyq bılik te sáýir aıynyń sońyna deıin kún saıyn 100 myń adamǵa test jasaýdy jolǵa qoıatynyn málimdep úlgerdi. Alaıda, synshylar bul kórsetkishke kúmánmen qaraıdy.
AQSh-ta koronavırýstan qaıtys bolǵandar sany 20 myń adamnan asty. Bul – álemniń kez kelgen basqa eline qaraǵanda eń kóp kórsetkish. Buǵan deıin eń kóp ólim-jitim Italııada bolǵan, biraq qazir Eýropadaǵy jaǵdaı turaqtana bastady. Djons Hopkıns ýnıversıtetiniń sońǵy málimetteri boıynsha, AQSh-ta Covid-19-dan kóz jumǵandardyń jalpy sany – 20,6 myń adam, dıagnoz 530 myńnan astam patsıentke qoıylǵan.
Buǵan deıin AQSh vırýstan bir táýlik ishinde eki myńnan astam patsıent qaıtys bolǵan álemniń alǵashqy eli boldy.
Álemde jeksenbi kúngi Covid-19 jaǵdaıy boıynsha, 1 mln 760 myń adam aýyrǵan. 110 myńnan astam adam qaıtys boldy (bul derekter DDU derekterinen sál ózgeshe). Senbi kúni Amerıkanyń barlyq shtatynda pandemııaǵa baılanysty tótenshe jaǵdaıdy engizildi.
Jeksenbi kúngi málimetter boıynsha Ispanııada koronavırýstan 619 adam qaıtys boldy, bul senbi kúngi kórsetkishterden (510 jaǵdaı bolǵan) birshama joǵary.
Sońǵy táýlikte Ispanııada vırýs juqtyrǵandar sany 5 myń adamnan asty, osylaısha Covid-19 vırýsymen aýyrǵandardyń jalpy sany 166 myń adamǵa jetip otyr.
Ispanııa – Frantsııadan keıingi týrıster sany boıynsha álemdegi ekinshi el, al týrızm sektory onyń ekonomıkasynyń 12% quraıdy. Eýropa elderi arasynda koronavırýstan ólim-jitimniń eń kóp sany áli de Italııada, munda 19,4 myń adam qaıtys boldy.
Bul elde Covid-19 koronavırýsymen 152,2 myń adam aýyrǵan.
Frantsııada senbide qaıtys bolǵandardyń sany jumamen salystyrǵanda úshten birge azaıǵan. Bul elde 130,7 myń adamǵa Covid-19 dıagnozy qoıylsa, 13,8 myń adam atalǵan indetten kóz jumǵan.
