Koronavırýs boıynsha álemdegi ahýal qandaı
BALTIMOR. QazAqparat – COVID-19 juqtyrǵan halqynyń sany mıllıonnan asqan AQSh-tan keıingi ekinshi memleket – Brazılııa bolyp otyr. Al Avstralııa ahýaldyń órshýine baılanysty shekteý sharalaryn qaıtadan kúsheıtpek. Brıtanııada eki aptalyq karantın engizbeý úshin áýejaı arqyly elge kirgen azamattardy aqyly testileýden ótkizýde. Álem halqynyń koronavırýspen kúresi jaıly QazAqparat tilshisi VVS-ge silteme jasap habarlaıdy.
Djons Hopkıns Ýnıversıtetiniń málimetinshe álemde 8,5 mln adam koronavırýs juqtyrdy dep habarlanǵanymen, bul kórsetkish aıtarlyqtaı kóp bolýy múmkin. Sebebi kóp adamda aýrý sımptomsyz ótýi múmkin. Testileýden ótpeı jatqandary da qanshama.
Al koronavırýsten kelgen ólim-jitim jaǵdaıy álem boıynsha 454 myń adamnan asty.
Reseıde indetti juqtyrý jaǵdaılary ótken táýlikte 7889-ǵa jetip, jalpy aýyrǵandardyń sany 580 myńǵa taıap qaldy.
Epıdemııaǵa qaramastan Máskeýde Jeńis sherýine qyzý daıyndyq júrgizilýde.
Máskeý qalasynda bir táýlikte jańadan 1057 jaǵdaı anyqtaldy. Bul – sáýir aıynan bergi eń tómendi rekordtyq kórsetkish. Bir táýlikte elde 161 adam koronavırýstan qaıtys bolǵan.
Reseıde indetten jan tapsyrǵandardyń jalpy sany - 8002. COVID-19-dan em-dom qabyldaǵannan keıin ótken táýlikte aýrýhanalardan 10100 adam shyqqan. Jazylǵandardyń jalpy sany 335 myń adamǵa jetti.
Vladımır Pýtın aımaqtardaǵy medıtsınalyq qyzmetkerlerdi «koronavırýsty basyp janshýǵa» shaqyrdy. El Prezıdenti aq halatty jandarǵa Máskeýdegi tájirıbeni negizge alýdy usynyp otyr. Sebebi reseılik astanada epıdemıologııalyq ahýal turaqtalyp keledi. Medıtsına qyzmetkerlerimen vıdeoformatta áńgimelesken Pýtın vırýspen kúreste kózge túsken medıtsına qyzmetkerlerin ordenmen jáne medalmen marapattaýǵa ýáde berdi.
Brazılııa mıllıon sheginen asyp ketti
COVID-19 juqtyrǵan halqynyń sany mıllıonnan asqan AQSh-tan keıingi ekinshi memleket –Brazılııa. Jańadan juqtyrǵandardyń sany bul elde toqtaıtyn emes.
Brazılııa Densaýlyq saqtaý mınıstrliginiń dereginshe, sońǵy táýlikte 54 myń adam koronavırýs juqtyryp, rekordtyq sandy kórsetken.
Epıdemııa aldaǵy ýaqytta alys aımaqtarǵa keńinen tarap, Amazonka aımaqtaryn sharpýy múmkin.
Brazılııadaǵy taǵy bir ókinishti rekordtyń biri: qatarynan tórtinshi kún elde koronavırýstan kóz jumǵandardyń sany 1200 mańaıynda tur. Jalpy elde 49 myń adam qaıtys bolǵan.
Elde koronavırýsqa testiler sanynyń jetispeýi shynaıy statıstıka resmı málimetten bólek degen boljam jasaýǵa májbúrleıdi. Sarapshylardyń paıymdaýynsha, memleket aýrýdyń shyrqaý sheginen áli óte qoımaǵan.
Aýyrý deńgeıi órship barady
Avstralııalyq Vıktorııa shtatynyń bıligi indettiń táýliktik ósimi 25 adamǵa jetkennen keıin shekteý sharalaryn qaıta engizýge májbúr bolyp otyr.
Shtattyń premeri Denıel Endrıýs aýrýdyń qaıta órshýine ókinish bildirdi. Onyń aıtýynsha, sáýir aıynan beri jańa jaǵdaılardyń jartysy otbasynyń ishinde bir-birinen juqtyrýdan nemese týǵan-týystardyń bir-birimen qarym-qatynas jasaýynan kelgen.
Aldaǵy aptada úıge keletin qonaqtardyń sanyn 20-dan bes adamǵa deıin qysqartý kózdelgen. Al kóshede on adamnan artyq jınalýǵa bolmaıdy. Meıramhanalardyń bir ýaqytta 50 adamdy kúterlik jospary taǵy úsh aptaǵa shegerildi. Qazirgi tańda bul shtattaǵy meıramhanalar 20 meımannan ǵana qabyldaı alady.
Jańa Zelandııada jańa erejeler boıynsha elge kelgen azamattar aýrý belgileri joq bolsa da 14 kún saıyn koronavırýsqa test jasaýǵa mindetteledi.
Ońtústik Koreıada keıingi táýlikte 67 jańa jaǵdaı tirkelgen. Bul – keıingi úsh aptadaǵy eń úlken kórsetkish.
Qytaıda jańadan juqtyrǵandardyń sany – 27. Onyń tórteýi shetten kelgender bolsa, 23 jaǵdaıdyń 22-i Beıjińde, al bir jaǵdaı Hebeıde bolǵan.
Covid-19 aýrýyna shaldyǵý jaǵdaıy Meksıkada da ósip barady: keıingi táýlikte ol elde 5030 jańa jaǵdaı tirkelgen. 647 adam jan tapsyrǵan.
Meksıkada jalpy aýyrǵandardyń sany 170 myń adam. Alaıda ondaǵy bılik juqtyrǵandardyń sany odan da kóp bolýy múmkin ekenin habarlady. Meksıkada koronavırýstan qaıtys bolǵandardyń sany 647 adamǵa jetti.
Testtik rejımdegi testter
Brıtanııadaǵy iri áýejaılar elge keletin jolaýshylardyń silekeıinen analız alyp, koronavırýsty anyqtaý sharýasyn testtik rejımde engizgeli otyr. Koronavırýs rastalmaǵan jaǵdaıda bul shara Brıtanııaǵa kiretin azamattarǵa 14 kúndik karantınnen bosaýǵa jol ashady.
Testileýdiń osyǵan uqsas júıesi Gonkongte de engizilýde.
Internet boıynsha jazylýǵa bolatyn mundaı testtiń baǵasy – 140 fýnt (172 dollar). Test nátıjesi 5-24 saǵat ishinde daıyn bolady. Testtik rejım jaqyn arada bastalady.
Sonymen birge Anglııada qonaqúı bıznesiniń qysymymen eki metrlik áleýmettik qashyqtyqty qysqarýy múmkin.
4 shildede Anglııada pabtar men meıramhanalar ashylýy kerek. Osyǵan baılanysty ondaǵy bılik eki metrlik áleýmettik qashyqtyqty qysqartpaq.
Jańa normanyń qandaı bolary áli belgisiz. Frantsııa, Danııa, Qytaı, Lıtva sekildi elderde bul qashyqtyq 1 metr bolyp otyr.
