Koronavırýs boıynsha álemdegi ahýal: Deksametazon tapshylyǵy jáne ólim-jitimniń artýy
JENEVA. QazAqparat – Dúnıejúzilik densaýlyq saqtaý uıymy koronavırýstan ólim-jitimdi azaıtýda jaqsy nátıje kórsetken deksametazon preparatynyń óndirisin arttyrýǵa shaqyrdy. QazAqparat bul týraly bbc.com saıtyna silteme jasap habarlaıdy.
DDU basshysy Tedros Adhanom Gebreıesýstiń aıtýynsha, deksametazonǵa suranys Oksford ýnıversıtetiniń ǵalymdary preparatqa júrgizilgen zertteý nátıjelerin jarııalaǵannan keıin birden artqan. Klınıkalyq synaq kezinde statsıonardaǵy 2 myńǵa jýyq naýqas atalmysh preparatty qabyldaǵan. Anyqtalǵandaı, ókpeni jeldetý apparatyna qosylǵan naýqastar arasynda ólim jaǵdaılary - 40-tan 28 paıyzǵa deıin, al Ekstrakorporaldyq membrandy oksıgenatsııadaǵy (EKMO) naýqastardyń arasynda 25-ten 20 paıyzǵa azaıǵan.
«Biz úshin kelesi synaq – deksametazon óndirisin ulǵaıtý, sondaı-aq ony álem boıynsha jyldam ári ádil taratý bolyp otyr. Bul rette, qajettilik joǵary elderge basymdyq beriledi», - dedi DDU basshysy.
Málim etilgendeı, deksametazon medıtsınada 60 jyldan beri qoldanylyp keledi. Onyń qabynýǵa qarsy áseri joǵary. DDU preparatty tek aýyr jaǵdaıdaǵy naýqastarǵa jáne dárigerlerdiń baqylaýymen ǵana berýge bolatynyn eskertedi.
Latyn Amerıkadaǵy ólim jaǵdaılary
Djons Hopkıns ýnıversıtetiniń derekterine sáıkes, Latyn Amerıka jáne Karıb basseıniniń elderinde koronavırýstan qaıtys bolǵandar sany 100 myńnan asyp jyǵyldy.
Ólim jaǵdaılarynyń jartysynan astamy Brazılııada tirkeldi. Bul el indetti juqtyrý jáne odan bolǵan ólim oqıǵalary boıynsha AQSh-tan keıin ekinshi orynda tur. Meksıkada 23 myńnan astam adam kóz jumdy. Brazılııa jáne Meksıka kórshi elderi sııaqty qatań karantındik sharalardy engizbegen bolatyn.
Ólim-jitim jaǵdaılary, sondaı-aq Perý jáne Chılıde kóp – sáıkesinshe 8,4 myń jáne 4,5 myń adam.
Sarapshylardyń paıymynsha, keıbir elder pandemııanyń sharyqtaý sheginen áli ótken joq.
Delıde jańa jaǵdaılar artýda
Úndistan astanasy Delıde bir táýlikte 4 myńǵa jýyq adamnan koronavırýs anyqtaldy. Bul, pandemııa bastalǵan ýaqyttan bergi eń joǵary kórsetkish. Delıde barlyǵy 66 myńǵa tarta adam indetke shaldyqqan. Syrqattaný ósimi kún sanap artyp keledi. Bılik ókilderi adamdardyń júrip-turýyn jáne baılanysta bolǵandardy anyqtaýdy jiti baqylaýǵa alatynyna ýáde etýde. Jýyrda Úndistan karantın sharalaryn jeńildetken bolatyn. Alaıda, vırýstyń taralý qarqyny basylar emes. Jalpy elde koronavırýs 440 myńnan astam adamnan anyqtaldy. Qaıtys boldy – 14,4 myń naýqas.
Eýropalyq odaq jáne Maldıv eli týrısterdi qabyldaýǵa daıyn. Nıý-Iork sýǵa shomylýǵa ruqsat bermek
Maldıv prezıdenti Ibragım Solıh óz eli týrısterdi 15 shildeden bastap qabyldaıtynyn málimdedi. Bul rette, sheteldik qonaqtarǵa koronavırýsqa test nátıjesin kórsetýdiń qajeti joq. Maldıv úshin týrızm tabystyń negizgi kózi bolyp tabylady. Pandemııa saldarynan naýryz aıynan beri halyqaralyq qatynas toqtaǵan bolatyn. Osy ýaqytqa deıin koronavırýs 2200 adamnan anyqtaldy.
Eýroodaq shekarany 1 shildeden bastap ashýdy josparlap otyr. Alaıda, koronavırýs boıynsha ahýal kúrdeli eldermen shekara jabyq kúıinde qalady. Atap aıtqanda, AQSh pen Reseıden keletin týrısterdi ázirge kirgizbeý usynylyp otyr. EO elderi qandaı memleketterdi qaýipsiz sanaýǵa bolatynyn anyqtaıtyn krıterıılerdi ázirleýi qajet.
Nıý-Iorkte 1 shildeden jaǵajaıda sýǵa shomylýǵa ruqsat berilmek. Bul týraly qala meri Bıll de Blazıo málim etken. «Saqtyqty umytpaıyq, jaǵajaıda da áleýmettik qashyqtyqty ustanyp, maska taǵaıyq», - dep jazdy ol Twitter-de. Qalada jaǵajaılar 25 mamyrdan bastap ashylǵanymen, shomylýǵa tyıym salynǵan.
