Koronavırýs boıynsha álem elderindegi ahýal
NUR-SULTAN. QazAqparat – Álemde koronavırýs pandemııasy saldarynan qaıtys bolǵan adamdardyń sany 2 mıllıonnan asty. Ulybrıtanııaǵa kirý úshin PTR-anyqtama qajet. Al Germanııada N95 standartyndaǵy respıratorlyq maska kııý mindettelmek. QazAqparat koronavırýsqa qatysty osy jáne ózge de jańalyqtar jóninde VVS-ge silteme jasap habarlaıdy.
Djons Hopkıns Ýnıversıtetiniń málimeti boıynsha, pandemııa bastalǵannan beri álemde vırýsqa shaldyqqandar sany 93,3 mıllıonnan asty, 2 mıllıonnan astam adam qaıtys boldy. Birqatar elde, atap aıtqanda Eýropada kúndelikti ólim-jitim 1 myńnana joǵary bolyp otyr.
Іndettiń kúrt ósýi saldarynan Brazılııanyń Amazonas shtatynyń astanasy Manaýs aýrýhanalarynda ottegi qory taýsyldy. Bólimshelerde bos tósekter, ókpeni jasandy jeldetý apparattary men ottegi maskalary da qalmaǵan. Dárigerler aýrýhanalarǵa jetkizilip jatqan jańa patsıentterge kómektese almaıtyndaryn málimdedi.
Brazılııa koronavırýs juqtyrǵandardyń sany boıynsha álemde – úshinshi orynda (8,3 mıllıon), qaıtys bolǵandar kórsetkishimen ekinshi orynda (207 myń) tur.
Ulybrıtanııa elge kirýge tyıym salady
Ulybrıtanııa premer-mınıstri Borıs Djonson 18 qańtar kúngi saǵat 04:00-den bastap álemniń barlyq elderinen erkin kirý toqtatylatynyn málimdedi. Bul shekteý karantınge qaramastan erkin qatynaý kelisimi jasalǵan memleketterge de qatysty bolyp otyr.
ıAǵnı endigide Ulybrıtanııaǵa keletinderdiń barlyǵy elge ushyp-shyqpas buryn koronavırýsqa test tapsyrýy qajet. Sondaı-aq Ulybrıtanııa aýmaǵyna kelgennen keıin 10 kún oqshaýlanýda bolady nemese 5 kúndik oqshaýlaýdan soń qaıta test tapsyrýlary tıis. Jańa shekteýler 15 aqpanǵa deıin kúshinde bolady.
Buǵan deıin Ulybrıtanııa jáne basqa da birqatar elder Ońtústik Amerıka, Portýgalııa jáne Kabo-Verde elderinen keletin jolaýshylarǵa ýaqytsha tyıym salǵan bolatyn. Bul sheshim osy aptada japon ǵalymdarynyń koronavırýstyń jańa, «brazılııalyq túrin» ashýymen baılanysty qabyldandy.
Іndettiń «brazılııalyq túrin» japon ǵalymdary Japonııaǵa kelgenderdiń barlyǵyn kúndelikti tekserý kezinde Brazılııadan saparlaǵan tórt týrıstiń analızinen tapqan.
Onymen bir mezgilde Ulybrıtanııada ózin-ózi oqshaýlaý sharalary nátıje bere bastaǵany týraly alǵashqy málimetter paıda boldy: sońǵy kúnderi jańa jaǵdaılardyń sany tómendep, R kóbeıý koeffıtsıenti elde ortasha eseppen 1,2-1,3-ke deıin tómendegen.
Londonda ýaqytsha máıithana jumys isteı bastady
Londonnyń soltústik-batysynda juma kúni ýaqytsha máıithana jumys isteı bastady. Ol birtindep keńeıip, 20 qańtarǵa deıin 1300 múrdeni qabyldaı alatyn bolady. Ulybrıtanııa astanasynyń meri Sadık Hanniń málimetinshe, Ulybrıtanııa astanasynda pandemııa qurbandarynyń sany 10 myńnan asty.
Aıta ketsek, Londonda pandemııanyń alǵashqy tolqyny kezinde ýaqytsha tórt máıithana ashylǵan edi. Biraq ol kezde máıithanalardyń qajeti bolmady.
Bir apta ishinde salynǵan máıithana tońazytqysh qondyrǵylary bar shatyrlardan turady. Osyndaı ýaqytsha nysandar basqa da aǵylshyn qalalarynda boı kótermek.
Eýropa: tyıym ústine tyıym
Germanııada Covid-19 juqtyrǵandardyń sany 2 mıllıonnan asty, sońǵy 24 saǵatta taǵy 1113 adam qaıtys boldy. Germanııa kantsleri Angela Merkel 16 federaldy jerdiń basshylarymen kovıd-sammıt ótkizip, qazirdiń ózinde qatań lokdaýndy odan saıyn kúsheıtýdi usynbaq.
Dúısenbiden bastap Bavarııa medıtsınalyq maskalarǵa jańa talaptar qoıady: ádettegi birrettik maskalar tıimsiz dep tanyldy jáne úı-jaılarda FFP2 standartyna sáıkes keletin respıratorlar kııý mindetteldi (bul maskalar N95 dep te atalady). Mundaı talap jaqyn ýaqytta eldiń barlyq aýmaǵynda engiziletini kútilýde.
Portýgalııada ulttyq lokdaýn jarııalandy, ol joq degende 30 qańtarǵa deıin sozylady. Mektepter, azyq-túlik dúkenderi, veterınarlyq klınıkalar, naýbaıhanalar, gúl dúkenderi men qonaq úıler ashyq bolady. Sondaı-aq azamattardan esh sebepsiz úıden shyqpaýǵa keńes berildi.
Vengrııa Qytaıdyń CoronaVac vaktsınasyn maquldaǵan alǵashqy eýropalyq el bolýy múmkin. Premer-mınıstr Vıktor Orban dál osy vaktsınany qoldanýdy usynyp otyr jáne eldiń farmatsevtıkalyq retteýshilerin sheshimdi tezirek qabyldaýǵa shaqyrýda.
Avstrııadaǵy Kıttsbıýel taý shańǵysy kýrortynda COVID-19 indeti kúrt tarady. Jergilikti basshylyqtyń pikirinshe, oǵan sebep Ulybrıtanııadan kelgen nusqaýshylar boldy. Endi kýrort óz bıýdjetinen búkil okrýgke koronavırýs synaǵynan ótýdi usynýda. Kıttsbıýelde áıgili «Shtraıf» tasjolynda taý shańǵysy boıynsha álem kýbogy kezeńderiniń biri ótip jatqan bolatyn. Alaıda aýrýdyń órshýine baılanysty ony Avstrııanyń basqa aımaǵyna aýystyrýǵa týra keldi.
Ispanııada rojdestvolyq merekelerden keıin indettiń kúrt óskenin aıtylýda. Qazirgi tańda eldegi aýrýhanalarda COVID-19 dıagnozy qoıylǵan 19 myń patsıent bar, olardyń kópshiligi qańtar aıynyń basynda túsken.
EO-nyń kóptegen elderi Pfizer vaktsınasyn ýáde etilgen kólemde almady, óıtkeni amerıkalyq kompanııa jetkizilimderdi keshiktirip jatyr. Shvetsııa, Danııa, Fınlıandııa, Lıtva, Latvııa jáne Estonııa bul jaǵdaıdy aqylǵa qonymsyz dep atady jáne onyń vaktsınatsııa protsesine senimdi tómendetetinin málimdedi.
Qytaıda naýqastar sany kóbeıdi
Qytaıda ótken jyldyń 1 naýryzynan bergi eń joǵary táýliktik kórsetkish tirkeldi – 144 jaǵdaı (naýryzda 202 bolǵan). Basqa elderdiń statıstıkasymen salystyrǵanda bul kórsetkish az bolyp kórinedi, alaıda Qytaı bıligi ony dabyl retinde qarastyryp otyr. Naýqastardyń kópshiligi 22 mıllıon halqy bar Hebeı provıntsııasynda turady. Osy provıntsııada shuǵyl túrde 3 myń oryndyq aýrýhana-ızolıatordyń qurylysy bastaldy.
Baıden Amerıkaǵa qol ushyn sozbaq: baılar kóbirek tóleıdi
20 qańtar kúni AQSh prezıdenti laýazymyna resmı kirisetin Djo Baıden elge qyzmetin 1,9 trln dollarlyq kómek paketin usynýdan bastaǵysy keledi. Bul soma ár amerıkalyqqa 1400 dollardy quraıtyn birjolǵy tólemderdi, jumyssyzdyq boıynsha járdemaqylardy jáne basqa da áleýmettik tólemderdi arttyrýdy qarastyrady. 400 mlrd dollary vaktsınatsııa naýqany men indetke qarsy basqa da sharalardy uıymdastyrýǵa jumsalady.
