Koronavırýs: Bos qalǵan qala kóshelerinde jabaıy ańdar kóbeıip ketti
LONDON. QazAqparat – Jańa COVID-19 koronavırýsynyń taralyp ketpeýiniń aldyn alý úshin engizilgen karantın sharalaryna baılanysty álemniń kóptegen qalalarynda kóshe qańyrap bos qaldy. Bul týraly QazAqparat agenttigi Yahoo News basylymyna silteme jasap habarlaıdy.
Jahandy jaılaǵan vırýs Ispanııa, Italııa, Japonııa jáne Chılı, sonymen qatar Ulybrıtanııa sekildi memleketterdiń elde tótenshe jaǵdaı jarııalaýyna sebep boldy. Osy jaǵdaı tabıǵatqa da áser etýde. Bos qalǵan kóshelerdi adamnyń ornyna jabaıy ańdar kezip júr.
Ýelstiń soltústiginde teńiz jaǵalaýyndaǵy Llandıdno qalasynyń kóshelerin Orme taýynan túsken jabaıy taý eshkileri erkin aralap júr. Janýarlar adam bolmaǵandyqtan qalaǵa qoryqpaı kirgen kórinedi.
Úndistandaǵy Odıshede jaǵalaý mańynda júzdegen tasbaqa baıqalǵan.
Shyǵys Londonda bir úıir buǵy Garold Hıll turǵyn úı keshenine erkin ornalasyp aldy. Boljam boıynsha, júzge jýyq buǵy kórshiles Dagnam qoryǵynan kelgen.
Osyǵan uqsas sýretter Japonııanyń Nara qalasynda da túsirilgen. Shamamen 100 jabaıy buǵy qalany kezip júr. Ádette, bul janýarlar qoryq mańynda júretin, olardy týrıster tamaqtandyratyn. Endi olar azyq izdep qala kóshelerin sharlaýǵa kiristi.
Úndistannyń halyq tyǵyz ornalasqan aýdandarynyń biri Ýttar-Pradeshtegi Tırýpatı qalasynan da turǵyndar teńbil buǵylardy baıqaǵan. Aıta ketsek, elde 1,3 mıllıardqa jýyq adam bar.
Italııanyń koronavırýstan eń kóp zardap shekken aýdandarynyń biri Bergamoda jabaıy qaban júrgenin kórgender bar.
Sońǵy málimet boıynsha, álemde koronavırýs juqtyrǵandar sany 1 mıllıonnan asyp, 50 myńnan astam adam kóz jumdy.
