Koronavırýs: BQO-da jedel shtab jumys isteýde
ORAL. QazAqparat – Batys Qazaqstan oblysynda jedel shtab qurylyp, barlyq memlekettik organdar men kásiporyndar kúsheıtilgen jumys rejımine kóshti. Bul týraly óńirlik kommýnıkatsııalar ortalyǵynda ótken brıfıngte qala ákimi Abat Shynybekov málim etti, dep habarlaıdy QazAqparat tilshisi.
Shahar basshysynyń aıtýynsha, elimizde tótenshe jaǵdaıdyń engizilýine baılanysty qalada barlyq qajetti sharalar alynýda.
Sonyń ishinde turǵyndardy azyq-túlikpen, basqa da ómirlik qajettilikpen qamtamasyz etýge, sanıtarlyq qaýipsizdik sharalaryna basa mán berilýde. Aıtalyq, qala halqyn sýmen jáne jylýmen qamtıtyn «Batys sý arnasy» JShS, «Jaıyqjylýqýat» AQ kúsheıtilgen rejımge kóshti.
Oblys ortalyǵynda 1446 bıznes nysandary jumys isteıdi. Sonyń ishinde 117 meıramhana, 213 kafe, 26 fılıaly bar 11 sýpermarket, 80 saýda úıi bar.
«Qazirgi tańda qala jıyrma aýmaqqa bólinip, jedel shtab ókilderi sol aýdandaǵy bıznes nysandarynda tótenshe jaǵdaıǵa baılanysty tıisti túsindirý jumystaryn júrgizýde. Qala aýmaǵynda ornalasqan 21 bazarda sanıtarlyq sharalar atqarylýda. Sol sekildi qalada jolaýshy tasymalymen alty kásiporyn aınalysady. 28 baǵytta avtobýs júretin bolsa, sońǵy aıaldamalarda qoǵamdyq kólikterdi dezınfektsııalaý sharalary qolǵa alyndy», dedi A.Shynybekov.
