Koronavırýs: BQO-da sońǵy tirkelgen jeti naýqas ta Reseıden kelgen bolyp shyqty
ORAL. QazAqparat – Batys Qazaqstan oblysynda sońǵy tirkelgen jeti naýqas ta Reseıden kelgen bolyp shyqty, dep habarlaıdy QazAqparat tilshisi.
Buǵan deıin habarlaǵanymyzdaı, 18 sáýir kúngi saǵat 22.30-daǵy sońǵy málimetke sáıkes Qazaqstanda koronavırýspen aýyrǵandar sany 1630-ǵa jetti. Sonyń ishinde jeteýi Batys Qazaqstannyń úlesine tıedi.
BQO-nyń shuǵyl shtaby málim etkenindeı, bulardyń bári de – Reseıde vahtalyq ádispen jumys isteıtin oblys turǵyndary. Olardyń ishinde eń jasy 20-da bolsa, eń úlkeni 47 jasta.
Saratov oblysymen shekarada ornalasqan «Tasqala» beketinen ótken kezde olardyń densaýlyqtaryna shaǵymy bolmaǵan. Alaıda karantındik statsıonarǵa jatqyzylyp, synama alynǵannan keıin jeteýiniń de koronavırýsqa shaldyqqany anyqtaldy.
Barlyǵy oblystyq juqpaly aýrýlar aýrýhanasyna ornalastyryldy, jaǵdaılary qanaǵattanarlyq.
Aýrý oshaqtarynda dezınfektsııalyq jumystar júrgizildi.
Osylaısha BQO-da syrqattanǵandar sany 46-ǵa jetse, sonyń ekeýi jazylyp shyqty. Sonyń ishinde 39-y – shetten kelgender. Jeteýi – buryn aýyrǵandarmen qarym-qatynasta bolǵandar.
Eske sala keteıik, budan buryn Reseıde jumys istep kelgen BQO-nyń bes turǵynynan koronavırýs anyqtalǵanyn jazǵan bolatynbyz.
