Koronavırýs: BQO-da sońǵy tirkelgen úsh naýqas Teńiz ken ornynda jumys isteıdi
ORAL. QazAqparat – BQO-da koronavırýs juqtyrǵan sońǵy úsh naýqas – Atyraý oblysynyń Teńiz ken ornynda vahtalyq ádispen jumys jasaıtyn óńir turǵyndary, dep habarlaıdy QazAqparat tilshisi.
BQO ákimdigi málim etkenindeı, olardyń bári de – 22, 23 jáne 24 jastaǵy jastar.
Búgin sondaı-aq tańerteń 12 naýqas anyqtalǵan bolatyn. BQO taýarlar men kórsetiletin qyzmetterdiń sapasy men qaýipsizdigin baqylaý departamenti basshysynyń orynbasary Nurlybek Mustaevtyń aıtýynsha, bulardyń jeteýi – medıtsına qyzmetkeri, olar buryn aýyrǵan áriptesterimen qarym-qatynasta bolyp, karantındik statsıonarǵa jatqyzylǵan.
Qalǵan bes adam – Reseıden kelgen Qazaqstan azamattary. Ekeýi – Túrkistan, bireýi – Batys Qazaqstan oblysynyń, ekeýi – Shymkent qalasynyń turǵyndary. Olar Saratov jáne Samara oblystarymen shektesetin «Tasqala» men «Syrym» avtoótkelderinen ótken kezde jedel járdemmen statsıonarǵa jetkizilgen.
Zertteý qorytyndysymen 15 adamda COVID-19 dıagnozy naqtylanyp, oblystyq juqpaly aýrýlar aýrýhanasyna ornalastyryldy.
Naýqastarmen qarym-qatynasta bolǵandar medıtsınalyq baqylaýǵa alynyp, aýrý oshaqtarynda dezınfektsııalyq jumystar júrgizildi.
Óńirde epıdemııaǵa qarsy kúres jalǵasýda.
Osylaısha BQO-da aýyrǵandar sany 189-ǵa jetti, sonyń bireýi – bala.
Oblystyq densaýlyq saqtaý basqarmasynyń basshysy Bolatbek Qaıýpovtyń málim etkenindeı, 31 adam jazylyp shyqsa, sonyń ekeýi – medıtsına qyzmetkeri.
«Qazirgi kezde oblystyq juqpaly aýrýlar aýrýhanasynda 158 adam jatsa, sonyń 36-sy – medıtsına qyzmetkeri. Sonyń jeteýi – dáriger, 12-si – medbıke, 12-si – sanıtar, tórteýi – býfetshi, bireýi – dezınfektor. Medıtsına qyzmetkerleriniń 20-synda aýrý jeńil túrde ótýde, 14-iniń jaǵdaıy ortasha. Budan buryn oblystyq juqpaly aýrýlar aýrýhanasynda dárigerlerge baǵynbaıtyn birneshe emdelýshi bar ekendigin aıtqan bolatynbyz. Olarǵa qatysty ákimshilik hattama toltyrylatyn bolady. Jalpy, oblysta koronavırýs juqtyrǵandardyń 80 paıyzy – Reseıden kelgender. Aýrýdy erte anyqtap, der kezinde emdeýdiń nátıjesinde indet oblystyń ishine taralmaı otyr», dedi B.Qaıýpov.
Eske sala keteıik, budan buryn BQO-da birden 17 adamnyń jazylyp shyqqanyn, Batys Qazaqstanda sońǵy tirkelgen 10 naýqastyń bári de Reseıden kelgenin jazǵan bolatynbyz.
