Koronavırýs: BQO-da sońǵy tirkelgen tórt naýqas Reseıden kelgen
ORAL. QazAqparat – Batys Qazaqstan oblysynda sońǵy tirkelgen bes naýqastyń tórteýi Reseıden kelgen, dep habarlaıdy QazAqparat tilshisi.
BQO-nyń shuǵyl shtaby málim etkenindeı, olardyń bári de – oblys turǵyndary.
Bulardyń ishinde birinshisi – Oral qalasynyń 30 jastaǵy turǵyny. Koronavırýs juqtyrǵan adammen qarym-qatynasta bolýyna baılanysty ol karantındik statsıonarǵa jatqyzylyp, zerthanalyq synama alynǵan.
Búgin koronavırýs anyqtalǵan tórt turǵyn Reseıde vahtalyq ádispen jumys jasaıdy. Olar Saratov oblysymen shekarada ornalasqan «Tasqala» avtoótkelindegi sanıtarlyq-karantındik beketten ótken kezde densaýlyqtaryna eshqandaı shaǵymy bolmaǵan. Karantındik statsıonarǵa jiberilip, zerthanalyq tekserý qorytyndysymen bulardan da koronavırýs anyqtaldy.
Qazirgi tańda oblystyq juqpaly aýrýlar aýrýhanasynda jatqan naýqastardyń jaǵdaıy qanaǵattanarlyq.
Syrqattarmen qarym-qatynasta bolǵandar anyqtalyp, barlyǵy medıtsınalyq baqylaýǵa alynýda. Aýrý oshaqtarynda epıdzertteý jáne dezınfektsııalyq jumystar júrgizilýde.
Osylaısha BQO-da aýyrǵandar sany 30-ǵa jetse, sonyń ekeýi jazylyp shyqty.
Kúni búgin provızorlyq statsıonarda 50, karantındik statsıonarda 158 adam jatyr. Úıinde oqshaýlanǵan 1396 adam dárigerlerdiń baqylaýynda.
Eske sala keteıik, budan buryn BQO-da ekinshi adamnyń úıine shyǵarylǵanyn jazǵan bolatynbyz.
